Dizionari de Lenghe Furlane

fum  fum  [FO]

1. s.m. gas che al derive de combustion, che al puarte in sospension particulis in forme di vapôr, che al pues jessi di diviers colôrs:  la flame dal fogolâr e jere biele, e il fum, plen di alis, al jentrave tal cjant de nape (Maria Forte, La tiere di Lansing); une glagn di fum, un fîl di fum; la glesie cu la puarte spalancade dulà che al jessive ancjemò, a ondadis, il fum dal incens de messe (Pieri Menis, Un macet di sanmartinis); "Sperin che il fum al vadi a soreli jevât!" "Cuant che il fum al va a soreli jevât: cjape il sac e va a marcjât. Se al va a soreli a mont: cjape il sac e va pal mont." (Luciano Rocco, La foghere); il diaul al saltà dentri berlant e butant fum di solfar pe bocje e pal cûl (Roberto Ongaro, Cretevierte)
   Var. fun , fump
   Cfr. fûc , flame¹ , cinise , poiate
   
   1. odôr o savôr di brusât:  e molave dut, e intant il mignestron al cjapave di fum (Alan Brusini, Amîs come prime)
      Sin. stiç , brusât , brusadiç
   2. sporc lassât dal fum:  la lûs de buinore […] e passave stentade pai veris a crostis di fum (Maria Forte, Cjase di Dalban)
      Sin. cjalin , frusin
2. s.m. dome tal sing., il fumâ tabac:  il fum, tirât a pet cun gust, i dave un plasevul inzirli che al parave vie poiantsi tal mûr (Amedeo Giacomini, Tal ospedâl); une buse di ostarie cun puce di fum e di bago (Alan Brusini, Come tai romançs)
   Cfr. tabac , spagnolet , spagnûl , sigaret , zigar , pipe , cinisâr , cjiche
3. s.m. esalazion di vapôr:  si voltà sorepinsîr […] a dâ une voltade ae polente che e butave sbufs di fum che a nasavin za di stiç (Maria Forte, La tiere di Lansing)
   Sin. vapôr
4. s.m. nûl di polvar, spec. tirât sù di un veicul:  stradis lungjis e blancjis che no finivin plui e il fum che si lassave daûr la moto come une stele comete (Alan Brusini, Par stradis lungjis)
5. s.m. (fig.) alterazion dal umôr par vie de rabie:  cjale no stâ nancje a fevelâmi che tu mi âs za fat vignî sù il fum!
   Sin. fumate
6. s.m. aparence cence sostance:  lis sôs promessis a son dome fum; "Plui fum che no cjarsons…", al diseve cualchidun rangagnôs (Maria Forte, Cjase di Dalban)
7. s.m. ande di cui che si svante, di cui che al è braurin:  vergjinele de taviele / senze il fum de la ambizion / je modeste simpri e biele (Pieri Çorut, La plovisine); a 'nd è che cun grant fum si tignin sù / e discorin de Chine, e dal Perù, / ne vidût àn il Cormôr fûr di Puscuel (Ermes di Colorêt, I, 207)
   Sin. albasie , supierbie , braùre
8. s.m., adi.inv. colôr grîs scûr:  un capot colôr fum
   Sin. cinisin , fumul

Polirematichis e espressions idiomatichis

• butâ fum tai voi loc.v.
• come il fum tai voi loc.av.
• dâ il fum loc.v.
• lâ in fum loc.v.
• lassâ cori la aghe injù e il fum insù loc.v.
• tant che il fum intai voi loc.av.
• tant che il fum tai voi loc.av.
• vendi fum loc.

Proverbis:

• a brusâ lens verts, si fâs fum e no fûc
• a impaçâsi cun canaie, la mignestre e pie di fum
• al tocje di lassâ lâ la aghe injù e il fum insù
• bisugne lassâ lâ la aghe injù e il fum insù
• bocje e fum a consumin dut
• dai cjamins al ven fûr fum
• fra l'amôr e il fum no si viôt nancje la lum
• i lens verts a fasin fum
• il fum al fâs deventâ biei
• il fum al va a riviel, al va dongje dal plui biel
• il fum al va par traviers, al va là che a son i bêçs
• il fum si viôt dulà che a fasin fûc
• la aghe e va injù, il fum insù e la fortune par traviers
• lasse che il fum al ledi insù e la aghe injù
• lasse lâ la aghe injù e il fum insù
• nol è stiç che nol dei fum
• trê robis a fasin scjampâ la int di cjase: il fum, la triste muîr e la cjase discuvierte