Dizionari de Lenghe Furlane

flame¹  fla|me  [FO]

1. s.f. ponte di fûc, manifestazion de combustion in forme di lenghe di lûs che si môf:  daûr dal cjar e pendolave la flame rosse dal feralut (Carlo Sgorlon, Prime di sere); la flame e veve tancj ponts di colôrs e lui scuasit al brincave cui voi ogni mudament, come un che al sta in orele al sun di ogni cuarde dal so strument (Maria Forte, La tiere di Lansing); cu la flamute de cjandele che i tremave su la muse, Zuan al someave il profete Gjeremie in persone (Riedo Pup, Zuan Gjeremie); de çocje di morâr e cricà plui fuart une bore e dal slambri che e veve fat tal boreç e vignì fûr une flamute come une lame di curtìs, vive, legre (Pieri Menis, A uciei cu lis archetis)
   Sin. vampe
   
   1. fûc:  ducj a scoltavin cence mot di cei, tal cjalt de flame che e sclopetave dal çoc di agacie (Maria Forte, Cjase di Dalban); adès dut a brusa, Matia: il seil al si impalidìs a chê flamis, favilis, e fun (Pier Paolo Pasolini, I Turcs tal Friûl); il fûc al sclopà te minuçaie, al cricà jenfri dai lens in crôs e une biele flame e smalità a viert (Dino Virgili, La aghe da pît la cleve)
2. s.f. (fig.) fuarce di un sintiment, spec. dal amôr passionâl, o sintiment che al à empit:  la flame dal amôr; lui l'è biel e o soi brute / ma no vuei compatiment: / ten scuindude la mê flame, / e cuviert il sintiment (Anute Fabris, A no po stâi); ce vitis che a fasin i vêrs e bogn talians par tornâ a inviulâ la flame dal valôr militâr, il «culto» dal eroisim, il «senso epico» de vuere (Josef Marchet, La sgarfade dal cjan)
   Sin. ferbince , fogôr , fuarce , fûc , passion
   
   1. [BF] (zerg.) persone amade:  ce i âstu fat di mâl a la tô vecje flame par che ti fruci a chest mût? (Checo Tam, Sense)
      Sin. amant , amât , passion
3. s.f. (fig.) il mostrâsi imburît di alc, massime di une voie, di un pinsîr, di une ande e v.i.:  intai voi e intal rideç che i tirave i lavris, e slusignave une flame di sfide sfaçade (Gianni Gregoricchio, Trê feminis)
4. s.f. (fig.) il jessi vîf, il jessi presint di alc:  gnot penze di dolôr dulà che ogni flame di ben ere distudade (Pieri Somede dai Marcs, L'ombrenâr)
5. s.f. colôr ros vîf, ancje in funzion adi.inv.:  une moto colôr flame
   Sin. bore , fûc , fumane , purpure , scalmane , scarlat , vampe
6. s.f. [TS] milit. simbul militâr o mostrine a forme di flame di cierts cuarps
7. s.f. [BF] (fig.) persone che si è inamorâts o amants:  Tambûr, sence mostrâ curiositât, / al domande di cualchi antighe flame, / al domande se il tâl l'è mai sposât, / al domande se è vive chê tâl dame (Pieri Çorut, Lis gloriis di Tambûr)

Polirematichis e espressions idiomatichis

• a flame alte loc.av.
• a flame basse loc.av.
• a flame vive loc.av.
• bati fûc e flamis loc.v.
• fâ fûc e flamis loc.v.