Dizionari de Lenghe Furlane

ros  /-ò-/  ros  [FO]

1. s.m. colôr primari, che tal spetri al sta jenfri naranç e viole, caraterizât di une lûs cun lungjece di onde plui o mancul jenfri 800 e 640 nm, tipic par esempli dal sanc:  un calendari cui dîs segnâts in neri e ros (Checo Tam, Il dì celest); pomodoros sglonfs di ros e di lûs, pevarons di un vert eletric o cualchi çate di indivie clare cui ôrs inriçâts (Maria Forte, Cjase di Dalban); il ros dal fûc al bale sclopetant dentri dai barcons des cjasis cu la ligrie dai fruts cjantarins (Dino Virgili, La aghe da pît la cleve)
   
   1. adi. di chel colôr:  di Istât chel prât al jere plen di papavars ros, barburicis celestis e paveis di tancj colôrs (Checo Tam, Micio-Micion); Atom in colme: fueis rossis dilunc lis spaleris, l'aiar al vendeme lis ultimis rascjis prin de zulugne (Dino Virgili, Friûl di Siarade)
2. adi., s.m. di une part dal cuarp, cuntun colôr vîf par vie di inflamazion, iritazion, emozion e v.i.:  Agnese e jere deventade rosse di vergogne (Roberto Ongaro, Il muc); i voi ju veve ros, di vê vaît (Alan Brusini, Gian Paolo Linda, I forescj); il ros de muse al tirave a puinte (Maria Forte, Cjase di Dalban)
   Sin. imbuît , ruan
3. adi., s.m. di cjavei o pêi, che a butin sul colôr dal ram:  une frutute plene di lints e cu lis strecis rossis (Franca Mainardis, Il sium di Lissandri); lui, lizêr e discolç, cui cjavei ros, blancs di polvar di strade, al trotave in bande dal so cjadenaç a cjalâ i anei che si sfreolavin te glerie e tal pulvin (Riedo Pup, Vergjilio)
   
   1. che, cui che al à i cjavei di chel colôr:  lui, Bortulat, al è ros di pêl e plen di semule pe muse (Josef Marchet, Lis predicjis dal muini)
4. adi., s.m. [BF] che, cui che al fâs part di comunitâts umanis cul colôr de piel che al è tipic des popolazions nativis de Americhe, spec. dal Nord Americhe:  blancs, neris, ros, zâi, e il colôr nol faseve nissune diference, che si jere dome cristians (Josef Marchet, Lis predicjis dal muini)
5. adi. di un mangjâ, fat cul pomodoro:  une paste cu la salse rosse
6. adi., s.m. che, cui che al à ideis comunistis o socialistis:  lu acusin di vê mot lis telis dal terorisim ros cuviert daûr de scuele di lenghis. La acuse no je provade e Mulinaris al reclame la sô inocence (Max Mauro, Un Friûl difarent: i 90 mhz di Onde Furlane); une scuadre di fantats a jerin jentrâts tune sale, là che si tignive un comizi di ros, e cun manganei par ca a vevin sgjarnât tancj che a jerin presints (Pieri Menis, Chei di Muraie); la Comune che i no fasarìn ormai / la Rossa Primavera che a no ven mai (Giorgio Ferigo, Trenta agns)
   Sin. comunist¹ , socialist
7. s.m. sostance colorante rosse tant che la vernîs, il smalt, i cosmetics e v.i.:  sul mûr de sô cjase Nando al veve netât il pinel, sporcjant di ros la façade (Alan Brusini, Par stradis lungjis); intant che si preparave alc altri, i frutats a vevin imbeletât di ros dute la muse de Madone e di S. Josef tant che a parevin doi cjocs (Pieri Somede dai Marcs, Sant Simon: 28 di Otubar 1917)
8. s.m. part rosse o colorade di alc:  fâ la pastele par omelettes batint i ros dai ûfs cul sâl, la spongje tenare e zontant pôc par volte la farine e il lat (Giorgio Pascoli, Il Litum: jerbis salvadiis te cusine); cul ros [de bandiere] in cjase dal segretari a àn fat doi grancj cussins pal sofà, e tal vert a àn fat doi gjachetins aes frutinis di un impleât (Pieri Somede dai Marcs, La bandiere)
9. adi., s.m. intai semafars, lûs che, cuant che si impie, e segnale l'oblic di fermâsi:  la dì dal esam, al passà in plen trafic cul ros. L'inzegnîr i berlà: «Ma saial che no si po passâ cul ros?» (Antoni Beline, Pre Pitin)
10. adi., s.m. [TS] zûcs colôr de metât dai numars de roulette che, se a jessin, a fasin dopleâ ce che si à zuiât su di lôr

Polirematichis e espressions idiomatichis

• blanc e ros loc.adi.
• blanc e ros come un miluç loc.adi.
• blanc e ros tant che un miluç loc.adi.
• crôs rosse loc.s.f.
• falcuç ros loc.s.m.
• fonc di rôl ros loc.s.m.
• fonc ros loc.s.m.
• furmie rosse loc.s.f.
• lipare rosse loc.s.f.

Proverbis:

• al è miôr deventâ ros e dî di no, che no deventâ verts par vê il so
• barbe rosse pêl di diaul
• cui che nol à mâl sù pe schene nol devente ros
• gjaline rosse e fâs bon brût
• lis putanis no deventin rossis
• nûl ros la matine, la ploie e je vicine; nûl ros la sere, bon timp si spere
• o vin ducj il sanc ros
• pêl ros e pêl di flôr, sot dal cîl no 'nd è piôr
• pêl ros, pêl dal diaul
• ros di mâl pêl cent diaui par cjavêl
• ros la sere, bon timp si spere; ros la matine, la ploie e je vicine
• tiere rosse e fâs bon gran, tiere blancje a lasse murî di fam
• une tace di vin ros di vinars sant, al va dut in sanc