Dizionari de Lenghe Furlane

rose  /-ó-/  ro|se  [FO]

1. s.f. part des plantis spermatofitis che e conten i orghins de riproduzion, dispès biele, colorade, profumade:  al crevave une rose e le impirave te asule dal golâr par tignîsi plui dongje dut il dì il so nasebon (Maria Forte, Cjase di Dalban); ogni tant al lave in cimitieri a meti cualchi rose di prât su lis tombis dai siei (Carlo Sgorlon, Prime di sere)
   Sin. flôr
2. s.f. plante che e fâs flôrs:  sot dal miluçâr e ator ator o vevi implantadis cuatri o cinc rosis: la mê passion (Pieri Menis, La scuele dai fornasîrs)
   Sin. flôr
3. s.f. plante e flôr dal gjenar Rosa:  la cjase e je deventade un zardin: rosis rossis sul taulin dal coridôr, su la taule dal tinel, su chê de cusine e ancje su la taulinute basse vicin de jentrade. Renzo al veve capît di no vê capît nuie e i domandave scuse (Cristina Noacco, Faliscjis)
   Sin. rose di odôr , garoful , garoful di spine , garduse , gartule
4. s.f. (fig.) persone biele e in salût, spec. in riferiment a fruts o a feminis zovinis:  Lise e veve parturît Titute, un frutìn che al jere une rose, san e biel (Pieri Menis, Chei di Muraie)
5. s.f. [TS] arm., venat. insiemi dai balins trats intun colp di une sclope
   Sin. rosade²
   
   1. aree plui o mancul taronde dulà che a rivin i proietii trats intun colp di une sclope
6. adi.inv., s.m.sing. colôr a mieç jenfri il ros e il blanc:  se ta chê musis blancji e rosa / a lûs chel ridi, chel, e no n altri, / chel fâ luturan e dolissious, / a è parsè che a son di ca, da la Alta! (Pier Paolo Pasolini, Viers Pordenon e il mont); lis pontis dai arbui si indoravin e là sù te cjarande a lusivin i veris de sô cjase e la façade blancje si tenzeve di rose cul soreli a mont (Pieri Somede dai Marcs, La cjarande)
   Sin. colôr di rose
7. adi.inv. di romanç, conte, gjornâl o film che a àn tant che argoment specific l'amôr:  cronache rose, po nere e, insom, zale (si sa i gjornâi a 'nd disin di ducj i colôrs) (Sandri Di Suald, Ah! la provincie)

Polirematichis e espressions idiomatichis

• Pasche des rosis loc.s.f.
• viodi dut colôr di rose loc.v.
• viodi dut in rose loc.v.
• viodi dut rose loc.v.

Proverbis:

• chê che no ame lis rosis, e je une cjase di butâ jù
• cuant che lis urtiis a àn la rose fin da pît, e ven une vore di nêf ancje al plan
• dutis lis rosis a van in fen
• e vâl plui une rose frescje che no un scovul
• fin che a son piçui, rosis e flôrs cuant che a son grancj, spins e dolôrs
• fra lis spinis e sta la rose
• nissune rose cence spine
• ogni biele rose a va in fen
• par taponâ la buse si met une rose
• prin dal matrimoni a son rosis e flôrs, po spinis e dolôrs
• prin rosis e flocs, po mierde e peçots
• tra lis spinis e nas la rose