Dizionari de Lenghe Furlane

fîl¹  fîl  [FO]

1. s.m. insiemi lunc e fin formât di fibris intorteadis, che al covente par tiessi, cusî, ricamâ e v.i.:  cui gucjave, cui corletave, cui filave la cjanaipe fasint pirlâ il fûs a pendolon dal fîl che si slungjave simpri plui (Pieri Menis, Sot il puarti); une scjatule di gusielis, fîi, fuarpiis e botons (Carlo Sgorlon, Il dolfin); intant che e taiave la polente cul fîl, i fruts a scomençarin a cragnâ che a vevin fam (Maria Forte, La tiere di Lansing)
   Cfr. filât , filâ , glimuç , ace , rochel , glagn , macete , ugnul , dopli , cjâf , imbastî¹ , cusî , ricamâ
   
   1. lin filât:  abits di frustagn, di bavele, di regadin, di fîl, di andiane e bombasine (Dino Virgili, La aghe da pît la cleve)
   2. fîl de cjane di pescje:  des barcjis e de tiere al è dut un pescjâ cu lis rêts, cul fîl e cul am (Giovanni Battauz, Flavio Cossar, Renato Iacumin, I mosaics de basiliche di Aquilee)
      Sin. ligne , fîl dal am
2. s.m. (fig.) leam, robe che e da dongje:  si sintive a tirâ, mo di une bande, mo di chê altre, dal fîl invisibil che al peave passât e presint (Franca Mainardis, Il sium di Lissandri); a i vigneva a ducj voa da leâsi cu la zent magari cul fîl magri dal discori (Novella Cantarutti, L'uminin dai stecs)
   Sin. leam , peam
3. s.m. element lunc e sutîl ancje no di fibris:  un archet cuntun biel fîl di fier zingât che no si inrusinive mai (Riedo Pup, Chei di Martrent)
   
   1. element lunc e fin cuntune anime di condutôr, pal solit fat di fibris di metal, e un rivistiment isolant, pal solit di plastiche, che al covente par trasmeti eletricitât o segnâi:  tant plui piçule e je la sezion di un fîl e tant plui grande e je la sô resistence eletriche (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); o jerin inmò taiâts fûr dal mont: no pueste, no coriere, no telegraf che l'aiar e il pês de nêf a vevin crevât i pâi e rot i fîi (Pieri Somede dai Marcs, 11 di Fevrâr 1929); "Culì al è il plevan che al fevele". E di chê altre bande dal fîl: "Oh, che al scusi, siôr plevan, o ai sbaliât numar; o vevi di fevelâ cul miedi" (Alan Brusini, Amîs come prime); piturât i mûrs, tirât i fîi pe musiche e lis cassis par sintîle, piastrelât o vin fat une biele taverne (Mario Beltramini, Jo e Graziella)
      Sin. cabli , fîl eletric
4. s.m. cualsisei robe che e vedi une forme lungje e fine:  la aria trasparent, senza una bava che disturbàs il spieli cuiet de la aga o i fîi lizêrs e sutîi de la jarba dei prâts (Federigo Comelli, Il me paîs)
   Sin. filiot , pêl , glagn
   
   1. fibrositât che e cor dilunc des vuaìnis:  a somein vecjis chês vuaìnis li, come nuie che a àn il fîl
5. s.m. [TS] agr. striche di tiere:  cjamps semenâts di sorc e di patatis, fîi di meniche, moraradis za çondaris e, daûr des cisis di olnâr, fossalats plens di aghe ferme (Pieri Menis, Lis çuculis dal Gjigjo)
   Sin. mitât , plagne , peçâl , ordenâl
6. s.m. corint lizere dal aiar o de aghe:  a vevin lassade la puarte de cjamare in sfese, tant di fâ cori un fîl di aiar (Gianni Gregoricchio, Trê feminis); no sintistu ce fîl di buerisine inglaçade che al sivile dentri? (Josef Marchet, Lis predicjis dal muini); la zornade e jere clare e nol tirave un fîl di aiar (Carlo Sgorlon, Prime di sere)
   Sin. corint² , bave , bavesele
   
   1. piçul flus di un licuit, che al forme come une linie:  un fîl di sanc jessût de bocje al veve maglade di ros la nêf (Pieri Somede dai Marcs, Nardon e Vigjute di Nani)
      Sin. rie
7. s.m. (fig.) ordin di sucession:  un insium al comence intune maniere e al pues finî intune altre maniere, cence un fîl logjic (Franc Fari, Il cjâf dai furlans); Guido al romp di brut il fîl dal mio discori (Sandri Di Suald, Ah! la provincie)
   Sin. cjâf , linie , ordin , plan¹ , cjaveç , trame , glagn
8. s.m. cuantitât une vore piçule:  un fîl di lûs al jentrave framieç da lis fressuris dal barcon (Franca Mainardis, Aiar di cjase); nol resti altri che avodâsi a chest fîl di sperance (Josef Marchet, Gjambadoriis)
   Sin. cimi , cininin , freghenin , fregul , gran , ninin , pêl , piç , sclip , segnâl , tic¹ , friç , fruçon , tininin , flic¹ , glagn
   
   1. part de personalitât:  la Speche le veve sì savude, o pûr induvinade, jê che e veve di sigûr un fîl di strie (Alan Brusini, Come tai romançs)
      Sin. ombre , ponte , tîr , alc
9. s.m. (fig.) persone une vore secje:  al è ridusût a un fîl
   Sin. cjandele , fîl pierdint
10. s.m. part di une lame che e taie:  al le dongje il barcon par cjalâ miôr il tai de manarie; al provà il fîl cul dêt e al tornà a la muele (Carlo Sgorlon, Prime di sere)
    Cfr. lame , uçâ , sfliliâ , guâ , once , filart
    
    1. ôr sutîl o spiçât di alc, massime di un mobil:  il fîl de taule
11. s.m. [TS] sport linie che e segne dulà che al rive prin cui che al vinç
    Sin. travuart
12. s.m. [TS] sport inte scherme, stocade tirade sul fier inte linie dal aversari, par parâ la sô menace

Polirematichis e espressions idiomatichis

• a fîl loc.av., loc.adi.inv.
• a fîl a fîl loc.av.
• a fîl di loc.prep.
• a fîl di muart loc.av.
• a fîl di tiere loc.av.
• a fîl di vôs loc.av.
• a fîl dopli loc.av.
• a fîl tiere loc.av.
• cul fîl dopli loc.av.
• fîl de schene loc.s.m.
• meti in fîl loc.v.
• meti perlis in fîl loc.v.
• par fîl e par pont loc.av.
• par fîl e par segn loc.av.
• par un fîl loc.av.
• pierdi il fîl loc.v.
• tirâ par un fîl loc.v.
• tornâ a cjapâ il fîl loc.v.
• vê un fîl di strie loc.v.