Dizionari de Lenghe Furlane

brombul  /brò-/  brom|bul  [CO]

1. s.m. pome cu la scusse colôr blu scûr che al tire sul viole, cu la polpe zale, di savôr dolç, fate dal arbul Prunus domestica, soredut de var. damascena, o ancje, daûr de localitât, pome de stesse specie ma di varietâts cu la scusse zale o rosse:  encja coculis, nolis, miluçs, brombui… (Aldo Tomè, Il mestri in cjasa)
   Sin. ciespe
   Var. brundul¹ , brugnul , bromp , brombule
   Cfr. emul
2. adi., s.m. colôr blu scûr che al tire sul viole
   Sin. brombulin , ciespe
3. s.m. (fig.) grop o macet di fîi leâts e taiâts in mût di stâ un dongjelaltri, par decorazion:  lui al met il pigjame, la barete cul brombul e vie tal jet (Romeo Patatti, Vecjos e grispis)
   Sin. pompon
   Cfr. penac , penacul
4. s.m. (fig.) element, soredut ornamentâl, di forme ovâl:  il bussul de aghe sante, e la corone, e lis Paziencis picjadis a un brombul de cocjete (Maria Forte, Cjase di Dalban)
5. s.m. (fig.) part dal cuarp sglonfe e in câs rosse, soredut par vie di une bote:  cuant che chel al si zirava in banda, Niu al podeva encja jodi il brombul che al veva intal sorneli (Ovidio Colussi, Il pilustrât)
   Sin. gnoc , ceregne , curumbule , grumbule , gnucul , gnucule , ciespe , ceve
6. s.m. (fig.) persone cun pocje inteligjence o pocjis capacitâts
   Sin. simiot , aloc , balote , barbezuan , batecul , batocj , biadin , catùs , coion , corli , cudumar , çondar , dordei , dordul , gnoc , gnogno , gnognul , imbambinît , lodul , mamo , marlup , mierli , mincjon , mone , monighe , pantalon , pote , salam , semplon , socol , stupit , totolò , biât , cretin , babuin , incoionît , râf , pistum , sacodâl , sturnel , sturnît , baban , bacalà , lolo , mauc , basoâl , mus , gnotul , batali , brocul , dordel