Dizionari de Lenghe Furlane

zûc  zûc  [FO]

1. s.m. ativitât di divertiment, che e pues compuartâ abilitâts particolârs e che pal solit e va daûr di regulis precisis:  lis robis di ogni dì, il zûc, i compits, la spese di fâ tes buteghis, i lens di sclapâ, e vie discorint (Carlo Sgorlon, Il dolfin); i plaseve la taçute dal vin e il zûc des cjartis (Pieri Somede dai Marcs, Il tinel); [i fruts] in chê volte no vevin ducj i zugatui di cumò, ur tocjave rangjâsi, inventâsi i zûcs (AAVV, Sul florî); o sin chi par zuiâ che il balon al è un zûc che se o devi vaî o voi a vaî in fabriche (Stiefin Morat, Donald dal Tiliment)
   Sin. divertiment , mateç
   Var. zôc
   Cfr. balon , bussulot , ocje , pulç , sfere , balute , bale , tiche e spane , pindul pandul , cavalete , biliart , pucebale , gjate vuarbe , tic¹ , scac , turul , cuarde , saltecuarde , burele , çonc , gure , dame , pilote² , bancut , bruscjete , bruse² , brustule , buse , busegombe , campanon , campo , bruscje , cite rote , bandiere , fave , favute , clap , cocule , gheo , gurli , burli , pirli , zirecode , platât , platâsi , puce , purcite , cuatri cjantons , vîfs e muarts , pimpinele , penacjin , sachemulin , pugnut traclut cassele , re e lari , rocochel , scocje , scuindi il façolet , semulute , spanute , tamburin , tiremole , toto , trie¹
2. s.m. tal pl., manifestazion sportive in plui garis:  Olimpie e costituìs un riferiment de civiltât umanistiche tra i Elens parcè che e propon la sfide dai zûcs al puest de vuere (Adrian Cescje, Viaç aes origjins dal Logos)
3. s.m. tal pl., spetacul di abilitât:  mi à insegnât a sunâ parcè che compagnàs i zûcs e i bai che la compagnie e faseve su lis placis (Pieri Somede dai Marcs, Mame…)
   
   1. rapresentazion publiche:  ogni tant a vignivin i fraris di Cividât a fâ il «zûc» dal Sant Sepulcri sul sagrât de glesie (Dino Virgili, La aghe da pît la cleve)
4. s.m. ativitât che e previôt une part di fortune li che si scometin bêçs:  intune citât siore tant che Vignesie, il zûc, il vizi e la pocje voie di lavorâ a fasin vivi tancj di lôr a sdavàs vie (Pierluigi Visintin, Friûl e furlans te Histoire de ma vie di Giacomo Casanova); i veve ancje domandât bêçs par Ricut che al veve pierdût al zûc (Maria Forte, La tiere di Lansing)
   Sin. zûc di azart , azart
   Cfr. faraon , briscule , brisculon , tressiet , more³ , lot , lotarie , scove , siet e mieç , terzili , dât³ , dadul , bassete , cale e cres in man , concine , concine vuarbe , criche , cricon , pampalugo , primiere , scarabocj , strope , tressiet in taule
5. s.m. ogjet fat par zuiâ:  lis frutatis invezit, trê une daûr la altre, si jerin rangjadis benon, prime cun zûcs e pipinis, po cui barbis che ur vevin simpri dât il lôr afiet (Pieri Menis, Chei di Muraie)
   Sin. zuiatul
   
   1. tabele, scheme, figure e v.i. cuntun enigme di risolvi par divertîsi:  al jere un lapis poiât su la pagjine di un zûc lassât a mieç (Agnul di Spere, I prâts des Savodagnis)
6. s.m. dinamiche o efiet che si fonde sul mudament, sul contrast e sim.:  il zûc dal aiar al tacà a impiâ [su la aghe dal mâr] grandis maglis di grispis, ce scuris, ce claris (Agnul di Spere, Int no consumade); intant che jê e cjalave inmagade chel zûc di lûs e scûr, lui al vierzè il baûl (Fabian Ros, Un piçul particolâr)
7. s.m. robe fate par ridi o par fente:  chei zûcs no fasevin mâl a nissun, anzit: a clamavin lis scusis, lis bussadis, lis cjantadis e la ligrie (Cristina Noacco, Faliscjis)
   Sin. scherç , mateç
   
   1. robe pôc serie:  la vite glotude e gjoldude intun bot di ligrie, sul convinciment che dut al varès di sei lizêr, disimpegnât, cuasi un zûc dome di ridi e po vonde (Angelo Floramo, Cuintristorie dal Nûfcent 1980-1990)
8. s.m. robe une vore facile di fâ:  convinci Bastian a vendi a lui, al sarès stât un zûc, stant che chel al voleve dome bêçs e no i interessave gran di ce bande che a saressin saltâts fûr (Franca Mainardis, Il sium di Lissandri)
   Sin. zughet , zûc di lodulis
9. s.m. (ancje spres.) dinamiche dificile di dominâ, li che a jentrin ancje fortune, casualitât, ecuilibri di fuarcis diferentis:  Cavedalis al scugnì pleâsi e cussì, ancjemò une volte, al fo cjapât dentri tai zûcs de politiche (Giovanni Pillinini, Zuan Batiste Cavedalis - Une vite esemplâr); o varìn un guvier di tabaiots […], o varìn un zûc soterani di intesis, di marcjâts, di diretivis par tignîsi parsore aghe a ogni cost (Josef Marchet, Se e larà drete)
10. s.m. [TS] mec. mecanisim che al regole un cualsisei moviment:  il zûc dal campanel (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    
    1. spazi libar tra doi o plui tocs intun mecanisim:  il pivot al à masse zûc
    2. (fig.) libertât di azion:  un ordenament che al permeti un fregul di zûc e di articolazion a chei teritoris (Josef Marchet, Tra il Lusinç e la Tor)
11. s.m. [TS] venat. sisteme o complès dai sistemis par tirâ dongje i uciei e cjapâju:  pre Zuan di sigûr, / a preparâ la tese, al è sul lûc, / cui siei franzei famôs e al plante il zûc (Emilio Nardini, Pre Pieri miserie)
    
    1. uciel vîf tignût par fâ svicinâ altris uciei:  al jeve a scûr. Ta la albe al à finît, / di tindi. El zûc al zorne, chê durdine, / sintît ce che si sgose là da pît! (Pieri Mation, Si viarç la cjace... e la oselade)
       Sin. riclam
12. s.m. [TS] sport frazion di une partide di tenis:  vinci il prin set par sîs zûcs a cuatri

Polirematichis e espressions idiomatichis

• fâ il zûc loc.v.
• fâ zûc loc.v.
• meti in zûc loc.v.
• metisi in zûc loc.v.
• par zûc loc.av., loc.adi.inv.
• stâ al zûc loc.v.
• vê bon zûc loc.v.

Proverbis:

• fortune in amôr e puarte fortune al zûc
• l'om si lu cognòs in trê robis: tal zûc, tal matrimoni, tal test
• Nadâl al zûc e Pasche dongje dal fûc
• ogni biel zûc al stufe, ogni bon pan al fâs la mufe