cocule
/cò-/
co|cu|le
[AF]
-
s.f.
pome e semence dal cocolâr, lat.sient. Juglans regia:
inte gnot di sant Zuan il cocolâr di Moruç al bute fûr lis fueis e al inmanie lis coculis (Catarine Percude, La rosade di sant Zuan);
Ursule parussule / ce fâstu su chê vît? / O mangji pan e coculis, / o spieti il gno marît (Popolâr, Ursule parussule);
vuê i fruts a vegnin pai siops su lis puartis: "Siops, siops, / coculis e lops: / dait, no dait / in paradîs lait…" (Dino Virgili, La aghe da pît la cleve)
Cfr. sgjarui
, malite
, scus
, sgjaruiâ
, bati
, davoni
, scomâ
, roncjâ
-
s.f.
(fig.)
ogjet che al vedi plui o mancul la forme e la dimension di chê pome
-
sglonfidugn sot piel, par vie di une bote o ancje par altris resons:
al molave jù di chês ceregnis di fâ coculis cussì sul cjâf e vergulis neris come l'ingjustri sui braçs (Pieri Menis, Cui si jerial impaçât cun Modestute?)
Sin. gnoc
Proverbis:
- a Sant Laurinç la cocule e scree il dint: screâ o no screâ, e je ore di sgjaruiâ
- a Sante Crôs pan e coculis
- copâ int, palâ nêf, sbroiâ morârs e spacâ coculis, al è dut timp pierdût
- dâi une femine zovine a un vieli al è tant che dâi une cocule a un frut
- fûr di un rôl no nassin coculis
- no stâ lassâti rompi lis coculis sul cjâf
- par vê la pâs in chest mont a vuelin trê robis: une femine par cjase, une passare par vile, une cocule par sac
- se al tone il dì di Sant Zorç, dutis lis coculis a van te cort
- trê voris a son dibant: palâ nêf, bati coculis e copâ oms
- un vieli cuntune zovine, al sarès tant che un frutin cuntune cocule
- une femine par cjase, une passare par vile, une cocule par sac
- une sole cocule no fâs sunsûr