Dizionari de Lenghe Furlane

briscule  /brì-/  bris|cu|le  [AF, TS]

1. s.f. zûcs zûc che si fâs cul mac di cuarante cjartis, un cuintri un o doi cuintri doi, li che sul principi de partide un dai cuatri pâi al ven sielzût e al pues permeti di cjapâ lis cjartis che si butin in taule:  al si sarès fermât tant vulintîr a fâ une piçule polse, e une partide di discors, ancje magari une altre partide di briscule (Giovanni Gortani, Un gustâ diplomatic); al stave a cjalâ i zuiadôrs di tressiet o di briscule (Carlo Sgorlon, Prime di sere)
   
   1. partide di chel zûc:  cuant che al jentrà te ostarie di Merlin a jerin in cuatri di lôr, tor di un taulin che a fasevin la briscule (Nadia Pauluzzo, Il bintar)
   2. pâl che al permet di cjapâ lis cjartis di chei altris pâi in chel zûc:  cul as di briscule in man, par aiar, par cjapâ (Dino Virgili, La aghe da pît la cleve)
   3. cjarte di chel pâl:  "Balote! Tu mi âs fat capî di vê il trê di denârs e tu mi butis il siet. Tu mi âs fat straçâ la briscule!" (Checo Tam, Se ti perdi tuo danno)
2. s.f. (fig.) element che si pues doprâ par otignî un risultât:  un om cussì svelt tal lâ a planc, cussì positîf tal misurâ lis peraulis, cussì sperimentât tal doprâ lis sôs brisculis indulà che a van dopradis (Josef Marchet, Il cancar); il Friûl tai ultins secui nol à vût tes mans nissune briscule buine (Dree Venier, Acuilis e canarins)
   Sin. cjarte
3. s.f. colp dât cun fuarce, soredut cu lis mans o cun alc che si ten in man:  svelts capitavin Grion, Leon e Secu, i trê plui bulos dal paîs e forsi forsi dal Friûl, cun tant di massanc daur dal cûl, e jù brisculis (Dolfo Zorzut, I Turians di Spessa)
   Sin. carobule , ceregne , ceve , cevole , copete , crufule , bote¹ , fotecje , legnade , poc¹ , pocade , raclade , slepe , slocje , sove , stringhe , vene² , vuadule , vueche , croc , crup¹ , pache , ton¹ , sgnesule , tonade , cuaie , croste , fritule

Polirematichis e espressions idiomatichis

• bati la briscule loc.v.
• doi di briscule loc.s.m.
• e compagnie briscule loc.av.
• in briscule loc.av., loc.adi.