Dizionari de Lenghe Furlane

stombli  /-ò-/  stom|bli  [CO]

1. s.m. sorte di baston no tant lunc, un pôc spiçât, par sponzi o par dâ jù aes bestiis e parâlis indenant:  tratile cun riguart [la vacje]; / no stâ a doprâ cun jê stombli ne scorie (Pieri Çorut, La vacje); cjariât il mus, al si invie sù cun lui cuintri cjase, molantji ogni tant cualchi cuaie cul stombli par animâlu (Luigi Gortani, Il matescul di Cjabie)
   Sin. sponton
   
   1. imprest par parâ indenant lis bestiis fat di gnerf o di corean o di altri materiâl, pal solit avonde fin e flessibil:  [l'ispetôr federâl fassist] al bateve sul taulin dal podestât il stombli di fantin che al puartave simpri daûr (Pieri Menis, E je lade ben)
      Sin. scorein
2. s.m. mani dûr de scorie:  siôr Agnul al segnà une crôs, par tiere, cul stombli de scorie, propit denant dai cjavai, cuant che a stavin par partî (Maria Forte, Cjase di Dalban)
3. s.m. (fig.) cualsisei element, materiâl o imateriâl, che al fâs lâ indenant, soredut cun autoritât o ancje cun prepotence:  [i furlans] a son ben persuadûts di vê bisugne di lôr [dai parons forescj] e di no savê lâ indenant cence la bachete o il stombli dal forest (Josef Marchet, Sudizion, la pecje dai furlans)
4. s.m. (fig.) persone pôc inteligjente:  «Ma ti plasevial chel stombli di muc?» (Pieri Menis, Doro)
   Sin. aloc , baban , balote , basoâl , barbezuan , batecul , batocj , biadin , biât , catùs , cocâl , coion , corli , cudumar , cretin , dordel , gnoc , gnogno , gnognul , gnotul , imbambinît , imbecîl , lodul , mamo , marlup , mauc , martuf , marzoc , mierli , mincjon , mone , monighe , pantalon , pote , râf , salam , semplon , socol , storcli , çus , totolò , trus , bacalà , sturnel , dordul , teto , tarlup , insemenît , incoionît , tambûr , idiote , pigne¹ , sdarnali , stupit