patoc1  /-òc/  pa|toc  [CO]

  1. adi. che al à patît une trasformazion degjenerative, une decomposizion, che al è lât di mâl:  o sin finîts tun cjamp di patatis fraidis, che lis patatis a àn une puce piês dai cristians patocs (Alan Brusini, Un dai pôcs)
    Sin. frait , vuast1 , lât1 , lât di mâl , març , corot1 , passât
    1. intacât fin insot di coruzion morâl:  e si varès di bramâ une strete union cuntun stât patoc e incurabil? (Josef Marchet, Il fiar dal ciroic)
    2. ancje dopo di un altri adi. cul stes significât par dâ plui enfasi, par dâ sens di completece o di superlatîf:  a son egoiscj, carognatis a son... fraits patocs, tal vevi dit (Pieri Somede dai Marcs, Un pugn di moscjis)
  2. adi. une vore umit, caraterizât de presince di tante umiditât o di tante aghe:  tune palût patoche (Alan Brusini, Come tai romançs)
    Sin. umit , bagnât , març , imbombât , imbombît
  3. adi. cjapât ad in plen dai efiets dal alcul, ancje dopo di un altri adi. cul stes significât:  par dîle dute, par tant patoc che i fos, chiste vision feminine a rivà subit a impiâmi ducj i sens (Stiefin Morat, Kebar krossè); al è cjoc patoc, il pote / e mo al cjante une vilote (Pierluigi Visintin, L'orcolat)
    Sin. becât , becât sot di une ale , bevût , çurul , grîs , imbarlumît , impiât , implombât , incarburât , incerât , intrunît , invreasât , legri , ligrut , muardût dal cjan neri , plen , pontât , pontât sot di une ale , taront , ticât , vuitul , palomp , cjoc1
  4. adi. che al è caraterizât di autenticitât, di corispondence plene a un ciert model, ancje dopo di un altri adi., par segnâ che la cualitât segnade e je plene, complete, massime:  [soldâts rus] devots patocs che a son un disfide al altri ae lôr stele rosse (Ivano Urli, Storie di Vera); e domandà, par castilian patoc, se par câs al veve di impiâ (Fabian Ros, Eivissa mon amour); [forments selezionâts che] a àn carateristichis agronomichis e nutrizionâls avonde dongje di chei de tradizion contadine plui patoche (Enos Costantin, Friûl: une patrie di blave)
    Sin. pûr2 , autentic , vêr , sclet , rampit , arût , rût , spacât