Dizionari de Lenghe Furlane

umit  /ù-/  u|mit  [AF]

1. adi. un pôc bagnât, cun aghe o cuntun cualsisei licuit:  a lavin a sentâsi sul nembri umit di un pradissit (Dino Virgili, La aghe da pît la cleve); tignî umide la stabilidure prime dal colôr (Franco Marchetta, Madalene); i voi i lusirin umits di lagrimis (Roberto Ongaro, Il muc)
   Cfr. agadôs , bagnât
   
   1. (fig.) caraterizât de presince di aghe o vapôr, che al à a ce fâ cu la aghe o cul vapôr, che al è componût o che al è causât di aghe o vapôr e v.i.:  il Luri si slungjave vie, li da pît, cu la sô vôs umide e cun tancj voi di lûs ta la aghe che e tremave (Dino Virgili, La aghe da pît la cleve); la ploie e veve finît di disgotâ la sô umide vite (Franca Mainardis, A ôr dal flum)
2. adi. dal aiar e dal clime o di un ambient, cuntune alte cuantitât di vapôr acui:  e respirave a plens polmons l'aiar umit di muscli (Franca Mainardis, Il sium di Lissandri); la ploie e je finide: l'aiar al è umit e fresc (Checo Tam, La maree nere)
   
   1. s.m. presince di une alte cuantitât di vapôr acui tal aiar:  il pai cu la asme nol podeve lavorâ te latarie par vie dal umit, dal bagnât (Alan Brusini, Come tai romançs)
      Sin. umiditât
   2. timp meteorologjic o cundizion meteorologjiche cun alte cuantitât di vapôr acui tal aiar:  un çoc di agacie fraidît dal umit e dal vint (Franca Mainardis, A ôr dal flum)
      Sin. umiditât
   3. puest caraterizât de alte presince di vapôr o ancje di aghe:  al jere un mistîr une vore fadiôs, par cui che nol è usât. E ancjemò o scugnivi lavorâ tal umit (Carlo Sgorlon, Prime di sere)
3. s.m. dome sing., efiet de presince sprolungjade di aghe suntun materiâl, cun deterioraments o cul vignî de mufe:  al veve ancje volût risanâ chê magle di umit che e vignive sù des fondamentis (Pieri Menis, Il fiâr dal plevan)
   Sin. umiditât
4. s.m. dome sing., maniere di cusinâ, soredut la cjar e il pes, cun bondance di tocj e fasint lâ a planc e par tant timp:  tripis cul formadi, rost cu lis «droghis», vidiel in umit (Pieri Menis, Chei di Muraie)
   Cfr. svuacet , stofât
   
   1. pitance cuete in chê maniere:  rîs cun tante di luianie, / les di cjar e di cjapon, / umit, rost e del vin bon; / chest al ere il lôr gustâ (Pieri Çorut, I poetis)