Dizionari de Lenghe Furlane

carnevâl  car|ne|vâl  [AF]

1. s.m. ancje cun iniz. maiusc., timp dal an jenfri Epifanie e Cuaresime, cuant che par tradizion si fasin fiestis in mascare, mangjadis, bevudis, mateçs e v.i.:  il Carnevâl al veve metût sbrendui e ligrie aduès ae zoventût dal borc, che si bandonave a matetâts (Maria Forte, La cotule di none Betilde); pai ultins di carnevâl i frutats dal paîs a vevin preparât une comedie (Pieri Somede dai Marcs, La comedie dal mus)
   Var. carnavâl , carnovâl
   Cfr. inseri , sevrut , carnevalon , joibe grasse
   
   1. lis fiestis che si fasin in chest timp, spec. inte ultime setemane prin de Cuaresime:  la maraveose citât [Vignesie] e platave, sot la vernîs des sôs pieris e dai siei carnevâi cence fin, une vecjaie che i roseave i vues e i faseve fraidessi la polpe (Josef Marchet, Cuintristorie dal Friûl fin sot la Italie)
   2. pipinot o personaç che al figure il carnevâl:  tun aiar penç di odôrs di crostui, l'ultin dì, al mûr Carnevâl purcjinel sul cjar, dopo il contrast cun Done Cuaresime vistude di pinitince (Dino Virgili, La aghe da pît la cleve)
2. s.m. (scherç.) an di etât di une persone:  cul pretest che i scomençavin a pesâ i carnevâi su la gobe, a pôc a pôc si jere metût a distirâ la sflacje (Luigi Gortani, Un paîs misteriôs); jo po ben us dirai, / che soi flap ancje jo, / che mi frachin la gobe i carnevâi, / e che in date di vuê / e son sessantetrê (Pieri Çorut, Il Strolic mezan. Pronostic par l'an 1855); il nono [al jere] masse indevant cui carnevâi par oponisi a ce che l'egoisim e la tristerie a vevin destinât (Franca Mainardis, Aiar di cjase)
3. s.m. (fig.) persone pôc inteligjente:  "Il cûr mal deve che mi sarès tocjât cualchi brut acident a tornâ cuventi. O Diu, ce carnevâl che soi stade!" (Luigi Gortani, Meni Fari)
   Sin. cudumar , cocâl , gnoc , macaron , macaco , barbezuan , batecul , batocj , catùs , corli , dordel , gnogno , gnognul , imbambinît , lodul , mamo , marlup , martuf , marzoc , mierli , mincjon , mone , monighe , pantalon , pote , salam , semplon , socol , stupit , totolò , aloc , bacalà , biât , gnotul , çus , sturnel , basoâl , dordul , articjoc
   Cfr. inseri

Polirematichis e espressions idiomatichis

• carnevâl des feminis loc.s.m.
• fâ carnevâl loc.v.

Proverbis:

• come che al va l'ultin di carnevâl e il prin di cuaresime, a va dute la cuaresime
• cuant che il pari al fâs carnevâl, i fis a fasin cuaresime
• cui che al à di maridâsi a carnevâl, di avent che al prepari la cjamare
• cui che no lis à fatis di carnevâl lis fâs di cuaresime
• di carnevâl ogni mat al vâl
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• lis mascaris si lis vent di carnevâl
• nol è mai carnevâl che no sedi lune di Fevrâr
• nol è mai stât l'ultin di carnevâl che no sedi fate o par fâsi la lune di Fevrâr
• Pasche e Nadâl, santissim carnevâl
• plui si devente viei, plui i carnevâi a pesin
• se si fâs carnevâl si à di ridi
• se si lavore tal carnevâl piçul, si viôt madracs piçui; se si lavore tal carnevâl grant, si viôt madracs grancj
• sta cul to avuâl se tu vûs fâ bon carnevâl
• ultin di carnevâl al po fâlu cualunche basoâl
• une volte carnevâl, une volte cuaresime