Dizionari de Lenghe Furlane

bocâl  bo|câl  [AF]

1. s.m. contignidôr, pal solit di crep, par meti dentri licuits di servî, in gjenar cuntun mani e cuntun ôr a bec par strucjâ il licuit in tacis o sim.:  Anute e rivà cul bocâl piturât a rosis rossis e blu e e jemplà dôs tacis di blanc (Pieri Menis, Sul agâr)
   Sin. bocalete
   
   1. contignidôr avonde grant, pal solit di veri o ancje di altris materiâi, di li che si bêf licuits, soredut bire:  Gretchen e puartave la bire balinant come un pirli: i bocâi a sglinghinavin su la guantiere (Dino Virgili, La aghe da pît la cleve)
   2. cuantitât di licuit che e sta dentri di chel contignidôr:  "Parone, si podaressie vê alc di mangjâ? E un bocâl di chel bon, mi racomandi" (Luigi Gortani, Al marcjât di Vile); E jù vin blanc!… Cuatri oris e sin restâts tal bacaro a supâ, lecâ e bevi!… Trops bocâi vino parât jù pal glutidôr? (Arturo Feruglio, Viaç a Vignesie)
2. s.m. [TS] metrol. vecje misure di capacitât, che e valeve plui o mancul 1,2 litris
   Cfr. cuinç , orne , boce , mieze boce , mezin
3. s.m. recipient par fâ dentri i bisugns:  la Eline e salte fûr sul barcon e cuntune vosate rabiose nus berle: «Ma si puedial savê ce da la ostie che o vês di lâ ator a secjâ lis mirindis ae int che e à voie di polsâ?». Nus à svuedât daprûf il bocâl (Meni Ucel, Serenadis)
   Sin. pitêr , urinâl , cantar
4. s.m. [BF] cui che al è pôc inteligjent, che si lasse imbroiâ:  oh Gjôs, se tancj bocâi / non sês, piait, vi prei, la mê difesa (Zuan Josef Busiç, La Eneide di Virgjili)
   Sin. baban , balort , banducel , barbezuan , basoâl , batecul , batocj , salam , catùs , cocâl , cudumar , çus , dordel , gnoc , gnognul , gnotul , inçussît , insemenît , manel , martuf , marzoc , mone , orgnan , pantalon , pote , biât , sacodâl , semplon , stupidel , stupit , sturnel , tololò , trus

Polirematichis e espressions idiomatichis

• fâ tiere di bocâi loc.v.
• lâ a fâ mantiis di bocâl loc.v.
• lâ a fâ tiere di bocâi loc.v.
• mâl dal bocâl loc.s.m.

Proverbis:

• cui che al fâs il prin al paie il bocâl di vin
• l'om che al alce masse il bocâl al devente un nemâl
• ni ca dal miedi par ogni mâl, ni ca dal avocat par ogni lît e nancje po par ogni sêt ca dal bocâl
• si scjafoin plui tal bocâl che no tal mâr