Dizionari de Lenghe Furlane

manel  /-èl/  ma|nel  [CO]

1. s.m. toc di len dret e avonde grues di jessi cjapât in man, in gjenar par dâ jù pachis:  la Cjabiusse, sveade di sium fûr, a si vistìs in cotul sot, e cjape sù un manel, jù inte cjanive [a dâ jù al lôf] (Luigi Gortani, La bolp e il lôf); "Ah, brut infam! / besteate; a mi, a mi, cumò, a cuinçâti! / cuatri vuaìnis cuntun bon manel" (Zaneto Del Puppo, Lis animis dal Purgatori)
   Sin. baston , mace , racli , manecul , manganel , ranganel
   
   1. toc di len in gjenerâl:  sul fogolâr al ardeve za il prin braç di manei di olnâr jenfri une çocje di rôl e une glove di morâr, il nadalin di chel an (Pieri Menis, Il pignarûl)
2. s.m. cuantitât di stecs o di altris ogjets, pal solit luncs, dâts dongje in paralêl, di mût che a puedin jessi cjapâts cuntune man o cu lis mans:  al veve tacât a regolâ la stale, a sclapâ lens e a peâ i manei dal venc (Gianni Gregoricchio, Îr e doman)
   Sin. mane² , manele , man
   Cfr. fas , fassine , grampe , grampade
3. s.m. (fig.) persone pôc inteligjente, ancje tant che ofese gjeneriche:  sarano justis? O pûr sarano stocs, sflocjis di un manel, di un catùs? (Lucian Verone, Il Strolic furlan pal 1999)
   Sin. trus , çondar , pote , mone , cocâl , dordul , dordel , dordei , çus , catùs , mierli , aloc , barbezuan , mus , marzoc , stupit , gnogno