Dizionari de Lenghe Furlane

pantan  /-àn/  pan|tan  [FO]

1. s.m. messedance di tiere e aghe:  finalmentri al rive, par une strade di campagne dute un pantan e plene di cjaradoriis che a fasevin ogni moment strabalçâ il caretin (Pieri Somede dai Marcs, Dure leç); si plea al groi e la arba sarala, roba che cres tal pantan dal palût (Ugo Pellis, La cjana gargana); o jerin sul Trentin: un pôcs ca e un pôcs là, tes busis. Pantan, frêt, fam, pedoi: organizazion taliane! (Riedo Pup, L'armistizi dal '16)
   Sin. palte , pantagnoc , velme
   Var. paltan
   Cfr. arzile , blacje , bumbuie , lacje , pacagneç , pacile , pacilot , pacjuc , poce , poç , slapagn , slapagnot , tiere
   
   1. messedance di tiere e aghe za suiade:  [fasint la archeolighe in Sirie] o soi stade a stâ intune cjase di pantan, su la tiere batude, parcè che nol jere paviment (Erika Adami, Katia Gavagnini ae scuvierte dai misteris de antighe Mesopotamie)
      Sin. arzile , tiere
   2. misture che e à consistence plui o mancul come chê de tiere e de aghe messedadis ma che e je fate di altris componentis:  tirada via da la muela la roncea, freiava un pâr di voltis la lama su la magna de la cjamesa par netâla dal pantan che gji si jera fermât sora nel uçâla (Federigo Comelli, Il me paîs)
2. s.m. spec. tal pl., teritori cuviert di aghe e tiere messedadis:  [la Livence] e va jù drete o a madrac, pai prâts, pai palûts, pes fratis, a pierdisi tai paltans de lagune (Dino Virgili, Un riul tra Venit e Friûl)
   Sin. palût
   Cfr. agaçâl , agadin² , bambuie , cormanie , lamac , lamâr , lame , molosse , olâr , paludere , paluderie , surtum , torbere , macile , macilâr , are¹ , avenâl , bulidôr , risultive , foladôr , folcjadice , folcjaç , fontanâr , gorghine , lavuache , vualmacje , samasse
3. s.m. (fig.) bassece morâl:  Lancelot, grant cavalîr ma plui voltis sbrissât dentri il pantan dal pecjât (Carlo Sgorlon, Il dolfin); scuintiâts che dut il dì a strissinin la lôr miserie intal pantan, rots a ogni vizi, a ogni intemperance (Amedeo Giacomini, Tal ospedâl)
   Sin. miserie¹ , porcarie , cragne
   
   1. dam al bon non:  done Pine cul so fâ, e veve tirade une sgrafe di pantan su la famee (Pieri Menis, Chei di Muraie)
      Sin. disonôr , vergogne
4. s.m. (fig.) situazion imberdeade, probleme complès di li che al è dificil vignî fûr:  un pantan burocratic
   Sin. garbui , imberdei , imbroi , ingredei , involuç , lichigneç , mignestron , pacile , pacjuc , pastiç , pastiel , pastrocj , petolon , petule , pistriç , pistrign , potacj , 'savai , scjapinade , sgarbui , stripiç , 'suf , 'sufiot , tananai , voluç , baraç

Proverbis:

• a pidadâ il pantan, si sporcjisi
• aghe sante e tiere a fasin pantan
• fumate la sere, bontimp si spere; fumate la doman, la sere al è pantan
• il soreli al bat tal pantan ma no si sporcje
• l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan
• tiere sante e aghe sante a fasin pantan