Dizionari de Lenghe Furlane

porcarie  /-ì-/  por|ca|ri|e  [AF]

1. s.f. ce che al è sporc e che al sporcje, complès di robis sporcjis:  i caratei zâi e verts e ros si incolmenin di porcarie fin che a sbrudiin di ogni bande e fin che lis scovacis a pendolin par ogni cjanton (Riedo Pup, I caratei des scovacis)
   Sin. soç , soçarie , sporc , cragne , cragnerie , cragnosetât , sporcjetât , sporcjisie
   Var. porcjarie
2. s.f. azion imorâl, injuste, disoneste e v.i.:  Jao al era pronevôt di un strion african che al veva mandât una maledizion cuntra di me barba, pa lis porcariis che chistu al veva fat in Africa una vora di agns prin (Stiefin Morat, Donald dal Tiliment); Toròs al à fat lâ in vacje la mozion dal clero dal ‘67 par taponâ lis porcariis dal so partît catolic (Antoni Beline, Universitât furlane: frignâ o cjapâ sù un racli?)
   Sin. carognade , carognarie , scrovade , scrovarie , porcade , tristerie
   
   1. ambient, situazion o disposizion interiôr imorâl, injuste, disoneste e v.i.:  la int e je strache di peraulis, no si fide plui di nissun […] viodût che la politiche e je dute une porcarie (Dree Valcic, La int e je strache dai partîts, ma scombatìn la malfidence)
3. s.f. azion, espression o maniere di fevelâ o di pensâ o di sintî volgâr, pervers e v.i.:  dut dispetenât, cun chel voli losc e cu la lenghe dute fûr, si viôt che al è un che al va ator pai zardins publics a fâ porcariis (Fabian Ros, Il lôf); a passin di straoris pes stradis dal paîs scolantsi di flât a cjantâ dutis lis porcariis di caserme (Josef Marchet, Lis predicjis dal muini); a vignivin a confessâsi di vê viodudis porcariis tal cine (Antoni Beline, Pre Pitin)
   Sin. indecence , ossenitât , scrovade , scrovarie , scrovetât , soçarie , socetât
4. s.f. ce che al è stât fat mâl o che al è brut o negatîf daûr di criteris estetics, artistics, funzionâi, cualitatîfs e v.i.:  dute la umanitât e scolte porcarie come Vamos a bailar vincj voltis in dì (Checo Tam, La maree nere)
   Sin. boiade , cjiade , mierde , orôr , vacjade , putanade , stupidade , cagade , cragne , robate
   
   1. robe di mangjâ o di bevi une vore triste:  "[…] Pare jù alc prin: A son porcariis ma dut al zove". Svelte i cjapà il plat e jal jemplà di tripis (Amedeo Giacomini, Tal ospedâl)
   2. robe di mangjâ o di bevi lade di mâl:  la grant part de int [dal lager] e mûr pal tif petecjâl o infezions tai budiei che i van fraits pes porcariis che ducj si è pronts a parâ jù pûr di confondi la fam (Ivano Urli, Storie di Min)
   3. robe di mangjâ, di bevi o ancje sostance di altre sorte o ancje patologjie che e fâs mâl pe salût:  "Orpo" gjo, "viôt che ti fâs mâl, Gjovanin, fumâ chê sorte di porcarie!" (Ivano Urli, Il conducente); daspò di vê doprât la energjie e lis bombis nucleârs par un pôcs di agns o sin za plens di porcariis radioativis (Franc Fari, Il cjâf dai furlans)