Dizionari de Lenghe Furlane

pastiç  pas|tiç  [CO]

1. s.m. robe di mangjâ fate di plui ingredients, tant che cjar, pes, verdure, in gjenar metûts a strâts cun lasagnis o messedâts cun altris pastis o par antîc involuçade inte paste, e cuete intal for:  o vin podût fermâsi a gustâ il vuardi cun lis jerbis, un pastiç di lasagnis e altris robis cetant buinis (Jacum dai Morârs, Mirinde cun lis jerbis 2014… dilunc i comunâi di Faedis); par uçâ l'apetît, / scomenci cul salam; / mignestre, les e frit, / un rost, robe di lat, / del pastiç di patatis, / e infin cualchi plat mat (Pieri Çorut, La mê vite di citât); i cinc plats che [Casanova] al à miôr a saressin, tal ordin, il pastiç di macarons prontât di un brâf cogo napoletan […] (Pierluigi Visintin, Friûl e furlans te Histoire de ma vie di Giacomo Casanova)
   
   1. preparazion fate di un o plui ingredients masanâts e ridots intun pan di paste avonde fisse, che e corispuint al francês pâte:  varês duncje il pastiç di ocje fat in cjase, che si conserve tal so gras; e si taie a fetinis par jempla fertaiutis o pagnut di mirinde (Emilia Baldassarre, Ort e cusine)
2. s.m. (fig.) robe fate mâl, cence ordin, cence criteri:  che [la leç di tutele] e sedi un puar pastiç de ipocrisie italiche par butâ fum tai voi, chel al jere di spietâsal (Adrian Cescje, Memoriis di politiche linguistiche)
   Sin. berdei , garbui , gredei , imberdei , imbroi , ingredei , involuç , mignestron , pastiel , pastrocj , pistriç , pistrign , potacj , 'savai , scjapinade , sgarbui , 'suf , 'sufiot , tananai , voluç
   
   1. situazion, cuistion che si fâs fature a discrosâle:  "Al sa, siôr dotôr ce pastiç di robis che son stadis, un messedament di ogni sorte, cui le vûl drete, cui le vûl stuarte, cui le vûl crude, cui le vûl cuete, cui al vûl ben, cui al vûl mâl…" (Pieri Somede dai Marcs, L'avocat e la luianie)
      Sin. casin , fisc , garbui , imbroi , mignestron , pacjuc , pastrocj , voluç , berdei , gredei , imberdei , ingredei , involuç , 'savai , 'suf , tananai
   2. spec. tal pl., situazion di dificoltât o pericolose:  Marquart di Randeck al jere cressût tai pastiçs de politiche ingredeose di Luduì di Baviere e di Carli IV di Lussemburc (Josef Marchet, Cuintristorie dal Friûl fin sot la Italie); nol jere pussibil lassâle bessole in chei pastiçs, bisugnave judâle in cualchi maniere chê puare frutate (Pieri Menis, Chei di Muraie)
      Sin. casin , berdei , imberdei , garbui , gredei , ingredei