Dizionari de Lenghe Furlane

cjanton  /-òn/  cjan|ton  [FO]

1. s.m. spazi li che si cjatin dôs liniis o dôs superficiis che a àn direzions diferentis:  il cuadrât al à ducj i lâts e ducj i cjantons compagns
   Sin. angul
2. s.m. spazi di un fabricât o di une stanzie là che doi mûrs cun direzions diferentis si zontin un cun chel altri:  chê cjase là sù, ferme e prosperose, che e someave un cjistielat cui voi neris de torate sul cjanton (Dino Virgili, La aghe da pît la cleve)
   
   1. spazi di un fabricât o di une stanzie cjapât dentri di doi mûrs cun direzions diferentis che si zontin un cun chel altri:  la agne e veve poiât la guantiere suntun mobilut a trê pîts che al jere tun cjanton (Checo Tam, Sense)
   2. spazi lassât fûr di doi mûrs cun direzions diferentis che si zontin un cun chel altri:  lis lûs impiadis sui cjantons des cjasis e su lis beorcjis des stradis, a mostrin che il paîs al è un desert cence sperance (Alan Brusini, Gian Paolo Linda, I forescj)
3. s.m. puest dulà che alc, soredut une strade o sim., e cambie direzion a sec o dulà che si cjatin dôs stradis che a rivin di direzions diferentis:  la cjase che e vignarà a sei propit sul cjanton tra une "avenida" e une "calle" e sarà un capitâl sigurât pai nestris fruts, pe nestre vecjaie (Lucio Perès, Il mâl dal mûr)
   Sin. volt¹ , svolt¹ , svolte , comedon
   Cfr. crosere , beorcje
4. s.m. part di une superficie di alc, cjapade jenfri doi ôrs, in gjenar perpendicolârs, che si zontin tra di lôr:  tal cjanton adalt de cartuline al è segnât dulà meti il bol
   Sin. piche , pisin , ponte , spice , pic
5. s.m. estremitât laterâl di alc:  Jacum, cu la pipe sul cjanton de bocje, che al ties zeis, o che al infere çuculis, o che al specole (Pieri Menis, Sul agâr); i riduçà a la frute e la frute e viodè a comparî tantis grisputis intal cjanton dai voi (Gianni Gregoricchio, Trê feminis)
   Sin. pic , pisin , ponte , spice , code
6. s.m. part di un spazi plui grant:  la globalizazion e je aromai, voie o no voie, un fat concret che al condizione e al impon adataments fin tal plui piçul cjanton di planete (Max Mauro, Un Friûl difarent: i 90 mhz di Onde Furlane); vueris no 'nd jere in nissun cjanton da la Europe (Carlo Sgorlon, Il dolfin); la sene e rapresente un cjanton di paîs (Pieri Somede dai Marcs, L'ombrenâr)
   Sin. toc¹ , blec , puest¹ , lambri¹
7. s.m. (ancje fig.) part di teritori in corispondence dai ponts cardinâi, direzion:  cuatri zovins vignûts dai cuatri cjantons de Groenlande (Fabian Ros, E la Groenlande e tacà a sunâ te sô lenghe)
   Sin. bande
8. s.m. (fig.) lûc fûr di man, scuindût, lontan:  cirìn un cjanton cuiet par fevelâ in pâs
   Sin. bande , puest¹ , buse , bûs
   
   1. (fig.) posizion di pocje impuartance:  Meni nol jere om di cjapâ caritâts fredis e plenis di pretesis, content, scuasit, di sei tignût de bande par no scugnî vê agrât a dinissun e sei libar tal so cjanton tant che i uciei te largjure dal cîl (Maria Forte, La rive di Sant Pieri)
      Sin. bûs , buse
   2. (fig.) part di alc no materiâl:  e veve fevelât a lunc cun lui e discuviert cierts cjantons platâts de sô anime zentîl e dolce tant che chê di un frut (Roberto Ongaro, Cretevierte)
      Sin. bûs , buse , ricès
9. s.m. [CO, TS] amin. sudivision aministrative dal teritori di un stât:  a dut chest si puedin ancjemò zontâ […] lis rivendicazions dal moviment politic ladin Zent Ladina Dolomites, nassût tal 1945 cun chê di jonzi la unitât politiche e aministrative di dutis lis valadis ladinis dolomitanis intun cjanton autonom metût adun sul model di chei svuizars e confederât cu la provincie di Bolzan (Marc Stolf, La libertât di lenghe tant che dirit fondamentâl. Atualitât e complessitât dai contignûts de "Cjarte di Chivasso")
   Sin. regjon , provincie , teritori , mandament , distret
   
   1. sudivision aministrative de Confederazion Elvetiche:  de Svuizare nol covente fevelâ: […] cuatri popui diferents di raze, di lenghe, di religjon, di temperament, a formin la plui salde unitât in gracie de largje indipendence che a gjoldin i siei 22 cjantons (Josef Marchet, Trê salts tal scûr: costituzion - republiche - autonomie)

Polirematichis e espressions idiomatichis

• daûr dal cjanton loc.av., loc.adi.inv.
• fâ cjanton loc.v.
• meti intal cjanton loc.v.
• meti intun cjanton loc.v.
• meti tal cjanton loc.v.
• meti tun cjanton loc.v.
• tignî sù trê cjantons de cjase loc.v.
• tignî sù trê cjantons di cjase loc.v.

Proverbis:

• la femine e ten sù trê cjantons de cjase, l'om un sôl
• voltât il cjanton, passade la passion