comedon
/-òn/
co|me|don
[AF]
-
s.m.
articolazion a mieç dal braç, spec. in riferiment ae bande difûr, a spice:
chê altre femine si jere butade cui comedons su la taule, strafate (Gianni Gregoricchio, Trê feminis);
il dolôr dal vedul al è il plui crût e vuai se al duràs; come chel dal comedon che al fâs viodi lis stelis, ma nol tire a lunc (Maria Forte, Cjase di Dalban);
al rive a metisi in sentons, al poie i comedons sui zenoi (Raffaele Serafini, Soreli jevât a mont)
Var. comodon
-
toc di une manie che al corispuint a chê part dal braç:
imblecâts i zenoi e i comedons, mendade a la miei cu sedi cualchi buse e cambiade la barete (Josef Marchet, La cotule imblecade)
-
colp o sburtade dade cun chê part dal braç:
siôr Talico si fasè indevant sfurducjant tal mieç de sdrume a sun di comedons (Dino Virgili, La aghe da pît la cleve);
fâsi dispiets a comedons, a pugns, a becadis di fâsi vignî sù taculis neris su la piel (Pieri Menis, Tinut di Libro)
-
s.m.
(fig.)
fuarce e capacitât di lavorâ:
la dote de femine e sta tai siei comedons (Roberto Ongaro, Cretevierte);
fortune che o vin bogns comedons (Pieri Somede dai Marcs, Tripoli bel sol d'amore);
al jere un fantaçon alt e fuart cuntun pâr di comedons che a varessin sacodade une montagne (Pieri Menis, Sul agâr)
-
s.m.
(fig.)
volt strent, spec. di flum o di strade:
van indenant, voltin un comedon di strade e propi li ti sintin un cjant […] (Dolfo Zorzut, L'on al judiche simpri mâl);
la roie e plee vie pai cjamps, intun comedon brusc (Franco Marchetta, Madalene)
Polirematichis e espressions idiomatichis
Proverbis:
- il siôr al à i bêçs, il puar i comedons
- l'om la sô sorte le puarte tai comedons
- la dote des feminis e sta tai comedons
- la fortune dal puar a son i comedons
- se no tu menis i comedons, a cjase no menin lis gramulis