Dizionari de Lenghe Furlane

code  /-ò-/  co|de  [FO]

1. s.f. part finâl dal cuarp di une vore di animâi vertebrâts, formade dal sprolungjament dal spinâl de schene:  al clame il cjan e chel al cor sot il barcon menant la code (Roberto Ongaro, Il muc); si sintivin lis vacjis a rumiâ e a svintulâ il scovet de code sul stran par parâ vie lis moscjis (Pieri Somede dai Marcs, Gnot clare gnot scure)
   
   1. part finâl o ancje dome part daûr dal cuarp di cualchi invertebrât:  la code dal vier
   2. çuf des plumis de code di un uciel:  la code dal pavon; la code dal gjal; un scriç al scjassave la code su la rame plui basse di un pin e ogni un tant al dave fûr il so strît (Amedeo Giacomini, Tal ospedâl)
   3. in diviers paragons, mûts di dî e v.i.:  se al disès - metìn a dî - un Stalin: - Fate la Grande Russie, cumò o pensarìn a fâ i rus - si saltarès sù tant che i madracs cuant che si ur pescje la code. Ma se lu dîs un talian, al è Vanzeli (Josef Marchet, La man e la arme); jê, che par sei une bolp finide, i mancjave nome la code (Alan Brusini, Un om di mont); al so om che al è daûr di jê tacât come la code (Pieri Somede dai Marcs, L'avocat e la luianie)
2. s.f. code di une bestie macelade:  code di manç in umit
3. s.f. bestie, singul animâl dumiesti:  o soi paron dome de cjase e di un flicut di braide e o ai une sole code te stale (Josef Marchet, Lis predicjis dal muini); une code di vacje, une code di purcit, une code di polam
4. s.f. anat. la part finâl plui sutile di cualchi orghin:  cheste volte al veve riscjât une vore però. Plui di mieç pancreas — la "code" interie e part dal "cuarp" al jere lât in necrosi (Amedeo Giacomini, Tal ospedâl); cun chei cuatri no saressis rivât nancje a bagnâ la code dal gargat (Josef Marchet, Lis predicjis dal muini)
   Sin. cûl
5. s.f. petenadure che e da dongje i cjavei daûr dal cjâf e ju lasse vignî jù tant che une code:  fâsi la code; une fantate cu la code
6. s.f. part finâl di un cualsisei ogjet:  la code dal avion; la code dal râf; la code de bandiere; une scorie cun trê codis che a finivin in ponte cuntun balin di plomp (Roberto Ongaro, Il muc); cheste busute cuadre - al ripià l'ispetôr - e servìs par podêi impirâ dentri un cuadrinut, ce saio jo, une codute di lime, par esempli, e cun chê fâ zirâ la clâf (Roberto Ongaro, Cretevierte); fâ plateformis di ciment armât pes provis dai canons, la plateforme e il gjet pai pilons cul fier, indulà che si poie la code dal canon (Ivano Urli, Storie di Min)
   Sin. cjaveç , cûl , daûr , font² , ôr , pic , piç , poc² , ponte
   
   1. striche di tiere lungje e strete
   2. zone periferiche, rispiet a une aree plui grande:  par secui, intant che la Furlanie e fo une code dal mont gjermanic, Grau si tignì in bon di sei une ponte dal mont latin (Josef Marchet, Cuintristorie dal Friûl fin sot la Italie)
7. s.f. part finâl di un grup di elements, di ogjets, di personis:  in pueste e jere une file cussì lungje che chei de code a savevin za che a vevin di spietâ almancul une ore
8. s.f. rie elements, massime personis, veicui e v.i., che a son in spiete e ancje il fat di stâ in spiete e il timp che si sta in spiete in rie:  e jentrà svelte te cjase di Cosset un pôc malcuiete di pôre di cjatâ une code di int (Maria Forte, La tiere di Lansing); «codis» di miezis zornadis devant di une buteghe cu la fam che e muardeve su la bocje dal stomi (Dino Virgili, La aghe da pît la cleve)
   
   1. (fig., scherç.) grup di tantis personis:  e jere la prime volte te storie che intun paisut come il nestri al vignive un sorestant dal guvier, il prefet, il federâl cun dute la code dai magnatos (Pieri Somede dai Marcs, Lis nestris rosis)
9. s.f. part zontade o conclusive:  forsit al dissen di leç i mancje une codute, une clausulute (Riedo Pup, Pantianis di cjase e gjats di fûr vie); rivâ a sintî dome la code de predicje
   Sin. conclusion , fin² , prionte , rionte , zonte
10. s.f. continuazion tal timp o piçule repliche:  il timp, in chês zornadis li, nol mancje mai di fâ biele figure: soreli e atmosfere tividine: une codute di Istât (Riedo Pup, I furlans e Sant Martin)
11. s.f. metr. sprolungjament dal scheme metric ordenari di une composizion:  inte ultime redazion il sonet al à titul Sunt de me vite e Broili i zonte une code (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
12. s.f. part finâl di un vistît che dispès si strissine par tiere:  la code dal frac; chei che a lavorin in grant tes locandis dai siorons, cu lis manecis di piel e la gjachete cu la code (Josef Marchet, Lis predicjis dal muini)
13. s.f. segn o usme lassade di alc che si môf:  la code de comete; lis scoreadis a sclopavin come sbârs e a lassavin une code ruane su la cjar de fantate (Gianni Gregoricchio, Trê feminis); come se jê e fos une bolp o une faìne, e e lassàs une code di odôr di salvadi daûr di se (Carlo Sgorlon, Il dolfin)
    Sin. sdrasse , ferade
14. s.f. (fig.) complès dai efiets, consecuencis di un fat, ancje cuntune cierte durade tal timp:  ogni tornade dai Conseis e je une barufe; e dopo la barufe, une code di polemichis sui sfueis dai partîts (Josef Marchet, Barufis)
    Sin. continuazion , strassin , rie , sprolungje
15. s.f. tecn. prodots residuâts:  la code de lavorazion
16. s.f. tecn. ultime frazion di un procès di distilazion
17. s.f. ancje in funzion di adi.inv., ultin di plui fîs:  la vuere e jere une ruvine complete, ma lis cartulinis a continuavin a rivâ. E cussì tal Setembar dal '42 mi rivâ ancje a mi, che o jeri la code de famee: disenûf agns (Alan Brusini, La cartuline)
    Sin. codarûl , codute
18. s.f. cont lassât di paiâ
19. s.f. Amarantus caudatus

Polirematichis e espressions idiomatichis

• a code basse loc.av.
• cence cjâf ni code loc.av.
• chê code no va sun chê agnele loc.
• code de Buie loc.s.f.
• cu la code dal voli loc.av.
• cu la code fra lis gjambis loc.av.
• cu la code jenfri i pîts loc.av.
• cu la code tra lis gjambis loc.av.
• fâ code loc.v.
• in code loc.av.
• indaûr come la code dal mus loc.adi.inv., loc.av.
• menâ la code loc.v.
• meti la code loc.v.
• meti la code fra lis gjambis loc.v.
• meti la code tra lis gjambis loc.v.
• parussulin de code lungje loc.s.m.
• savê dulà che il diaul al ten la code loc.v.
• savê petenâ la code al diaul loc.v.
• sbassâ la code loc.v.
• tirât sù in code loc.adi.
• vê la code di paie loc.v.
• vê la code di stope loc.v.
• vê la code di stran loc.v.

Proverbis:

• a freâi la schene al gjat, al drece la code
• a son tancj i mus in montagne che a àn la code compagne
• al è miôr tignîlu pe brene che no alçâlu pe code
• al mene la code il cjan no par te ma pal pan
• ancje il cjan cul menâ la code si vuadagne la spese
• cuant che il mus nol à fate la code di trente agns, no le fâs altri
• cuant che lis feminis si picjin, il diaul si petene la code
• cuant che si crôt di ripiâsi, e je chê volte che si è su la code dal mus
• divuardi che la cjavre e ves la code lungje
• dome che il mus al mene la code par dibant
• dulà che il diaul nol po rivâ al met la code
• e clope ancje la code dal mus, ma no cole
• e treme la code dal mus, ma no cole mai
• freii la schene al gjat che al dreçarà la code
• il cjan nol mene la code par dibant
• il cjan nol môf la code se no si lu paie
• il diaul là che nol met il cjâf al met la code, e cui che no lu cjace lu sacode
• il mus che nol à fat la code di trente agns no le fâs plui
• il velen al sta te code
• intant che i litighents a tirin la vacje, un pai cuars e un pe code, i avocats a molzin
• lauditi cjan che tu âs la code lungje
• lauditi cjan che tu âs une biele code
• Març al mene la code pal bearç
• miôr tignîlu pe cjavece che no alçâlu pe code
• miôr vuê il râf e doman la code
• nancje il cjan nol mene la code dibant
• no bisugne tocjâi la code al madrac
• nome il mus al mene la code par dibant
• ogni cjan al laude la sô code
• ogni cjan al laude la sô code, ogni femine il so frut
• ogni famee al è un demoni e al mene la code pardut
• Sant Zuan nol imbroie une code di cjan
• se il mus nol à fat la code di vincj agns, no le fâs plui
• une femine cence grumâl a je tant che une vacje cence code