Dizionari de Lenghe Furlane

ferade  /-à-/  fe|ra|de  [FO]

1. s.f. linie di comunicazion e di traspuart dai trens:  ae fin dal Votcent […] e ven fate la ferade Udin-Tarvis e daspò chê di Sacîl intal 1911 (Rino Gubiani, Studi da la evoluzion dal paisaç mediant i toponims); lu meterin te «teritoriâl», ven a stâi a fâ un pôc di dut tal interni: di vuardie a puints su feradis e stradis, di vuardie a dipuesits (Pieri Menis, Destins); a cjaminavin par lâ te stazion de ferade (Agnul di Spere, In viaç di domenie)
   Sin. ferovie
   Cfr. sine , traviersagn , traversin , slipar
   
   1. organizazion o societât che e garantìs il servizi di traspuart cui trens:  Gjelmo Loi che al è te ferade, in plante stabile a Gurize Mont Sante, i met in lûs juste apont chê cumbinazion [di podê jessi cjapât a vore] (Ivano Urli, Storie di Min)
      Sin. ferovie
2. s.f. segn lassât cjalcjant, tocjant, sfrissant e v.i.:  e frontave i pîts par tiere lassant la ferade su la glerie (Alan Brusini, Come tai romançs); Zuan al infondà i stivai in chel fof [de nêf] cence sintî dut il biel di chê mondisie e cussì al segnà la prime ferade di un pas di om (Maria Forte, La tiere di Lansing); tai fossâi dilunc vie la strade, parsore la glace, si viodevin lis feradis des sgliciadis dai fruts (Carlo Sgorlon, Prime di sere); li lu cjatarin chei che a vioderin la ferade di sanc (Maria Forte, Il Bulo di Crodio)
   Sin. impront , pescjade , stamp , stampe , tibiade , tibie¹ , talpade , cjaradorie ipon. , olme , peste²
   
   1. cualsisei segnâl, no dome di viodi o di tocjâ, lassât di cdn. o di alc:  lis feminis a passin par strade cul zei dal pan cuet: al lasse daûr une ferade di bon odôr (Dino Virgili, La aghe da pît la cleve); al lassave daûr vie une ferade di sudôr e di lisp di fâ gomit (Alan Brusini, Amîs come prime); e bateve dutis lis stradis e lis vilis des valadis, cirint cualchi ferade dal fi (Carlo Sgorlon, Il dolfin)
      Sin. segn , segnâl , usme , olme
   2. [TS] venat. complès di segns, tant che odôrs, olmis e altri, che a significhin pai cjans e pai cjaçadôrs che al è passât il salvadi:  [il cjan] al nase, al cîr e al sgarfe. Une volte che al à vût nasât la ferade, si met a balâ la monfrine e i va daûr (Cristina Noacco, Faliscjis)
      Sin. usme
3. s.f. (fig.) indizi, segnâl o complès di segnâi che a puedin judâ a cjatâ alc o cdn.:  [i mucs] a olmavin ogni ferade par dâur la gafe [a dôs spiis talianis] (Maria Forte, Cjase di Dalban)
   Sin. olme , segn , segnâl
4. s.f. (fig.) schirie di elements o fats de stesse sorte:  risorsis monetariis, necessariis par contrastâ une ferade di rivoltis che a segnaran la storie europeane a tacâ dal XIII secul (Fabian Ros, La invenzion dal stât)
   Sin. rie , schirie , code , serie
5. s.f. (fig.) esempli, model di lâi daûr:  o vevi dedicade la mê opare ancje ae preparazion di tescj didatics par dâ un sugjeriment, une ferade par che altris a continuassin par chê strade (Adrian Cescje, Memoriis di politiche linguistiche)
   Sin. esempli , model , pescjade , segnâl , spieli , stamp , implant
6. s.f. [TS] sport viôt vie ferade

Polirematichis e espressions idiomatichis

• fâ ferade loc.v.
• lassâ ferade loc.v.
• mudâ ferade loc.v.

Proverbis:

• cuant che tu viodis il lôf, no stâ lâ a cirî la ferade