Dizionari de Lenghe Furlane

zonte  /-ò-/  zon|te  [FO]

1. s.f. il meti alc in plui, il metisi dongje di alc altri e il lôr risultât:  il Parlament al fasè buine la leç n. 482 che e tutele dodis lenghis minoritariis, che tra di chês il furlan, cu la zonte dal adietîf "storichis" (Odorico Serena, Il furlan tes scuelis e te universitât)
   Sin. adizion , prevanç , rionte , slungje , soreplui , inzonte
   
   1. element, sedi materiâl che imateriâl, ancje azion, che e je in plui rispiet a alc altri:  prin di lâ sù a durmî, al cirive tai armârs, par parâ jù une zonte di cene, che al veve simpri une slisse di chês (Maria Forte, Cjase di Dalban); e esist te lenghe furlane une grande famee di peraulis […] cu la zonte valutative in eo. Par esempli «cjamineo», «cjacareo», «feveleo» (Riedo Pup, Il furlan al jentre in tribunâl); l'assessôr al dîs ancje che il progjet, cu lis zontis e cui mudaments, al varà di jessi tornât a publicâ di plante fûr (Redazion Radio Onde Furlane, Regjon Coridôr 5 At de Zonte); la scriture a çampe disot vie [de cjarte gjeografiche] e je une zonte a une incision anteriôr (Zuan Nazzi Matalon, Ottorino Burelli, Cjartis antighis dal Friûl)
   2. (fig.) element acessori, che al dipent di alc altri e che al è mancul impuartant rispiet a alc altri:  autonomiscj furlans che a vevin scombatût par un Friûl che nol fos une zonte ni di Vignesie ni di Triest (Bepi Mariuz, I furlans a bramavin une Regjon furlane)
2. s.f. massime in libris e publicazions, part in plui, che e pues jessi sedi tal stes volum che intun volum in bande, che e pues vê tescj, dâts, figuris e v.i. che a completin la publicazion:  par solit [il libri des Orazions] al jere leât adun, tant che une zonte, cul catechisim dât fûr ta chel stes an [1772] par ordin dal arcivescul Zanieroni Gradinigo (Zuan Nazzi Matalon, Preieris furlanis)
   Sin. complement , suplement , prionte
   
   1. volum di inzornament, soredut di oparis di consultazion, ancje tant che titul:  chest so impegn al puartà, dal 1919 al ‘23, ae publicazion in autografie di "Il tesaur de lenghe furlane", un racolte di 826 pagjinis […], racolte integrade plui indenant cuntune "Zonte a lis vilotis" (Renzo Balzan, Achille Tellini e i rapuarts interladins)
   2. document o modul complementâr rispiet a un altri principâl:  inte aplicazion dai criteris dal come 1, si ten cont dai indicadôrs che si cjatin inte zonte "A" di chest regolament (ARLeF, Regolament sui criteris e su lis modalitâts pe concession di contribûts pe promozion de lenghe furlane intai setôrs de editorie, dal spetacul e de ricercje sientifiche)
3. s.f. [TS] inform. document, imagjin o altri file che al ven mandât dongje di un messaç di pueste eletroniche o ancje che al è metût a disposizion intune pagjine web e che si pues discjariâ:  se ti rivin comunicazions o domandis strambis, zontis o links di int scognossude, controle ben prin di vierziju (Priscilla De Agostini, Ce stîl!)
4. s.f. pont di union di doi o plui elements:  il bati ritmât des ruedis [dal tren] su lis zontis des sinis, al deventà dutun cun chel dal so cûr (Gianni Gregoricchio, Trê feminis)
5. s.f. ancje cun iniz. maiusc., cuarp ristret di aministrazion cun funzions esecutivis e deliberativis:  daspò lungjis tratativis tra i partîts, si formà la Zonte gnove (Adrian Cescje, Memoriis di politiche linguistiche); i tiermins legâi a vevin di jessi di 6 mês par che la Zonte e fasès il regolament atuatîf (Sandri Carrozzo, Autonomie e politiche linguistiche pal furlan)
   Sin. comission , deputazion
6. s.f. sotprodot alcolic che si faseve resentant la trape:  il butaç l'è pront pe zonte, / cuant che o vais a ristielâ / se cul vin farês prionte, / ce oplalelis e ce ucâ! (Silvia Giuliani Braidotti, Il scugjelâr)
   
   1. vin une vore trist:  [l'ostîr] al à podût, doi mês dopo, rifilâ ai americans dute la zonte che al veve te cjanive (Josef Marchet, Lis predicjis dal muini)

Polirematichis e espressions idiomatichis

• in zonte di loc.prep.
• par zonte loc.av., loc.adi.inv.