Dizionari de Lenghe Furlane

comission  /-òn/  co|mi|ssi|on  [FO]

1. s.f. contrat par puartâ insom un lavôr:  la nestre imprese e à cjapât comissions inte Gnove Scozie, tal Labrador, te Terranova, simpri in Canadà. Lavôrs considerâts jenfri i plui grancj e interessants de nazion (Oscar Puntel, Mario Collavino: une bandiere furlane parsore il gnûf World Trade Center di New York); chei altris a son artesans, che a lavorin daûr comission direte (Adrian Cescje, Liniis di storie sociâl e economiche dal Friûl 1500 - 1800)
   Sin. comande , ordin , incjarie , contrat² , mandât , afidament , afâr , vore
2. s.f. piçul impegn par cuistions burocratichis, par comprâ alc o sim.:  lu veve clamât par compagnâle par comissions che e doveve fâ, intant che al vuidave cidin jê imbastive un discors par judâlu a liberâsi di chel pês che al puartave te anime (Egle Taverna, Lâ daûr dai siums)
   Sin. afâr , assum , facende , impegn , incombence
3. s.f. ricompense che e spiete a cui che al fâs di intermediari, di rapresentant e v.i.:  [cu la jentrade dai euros in Slovenie] nie plui spesis di comission a pro di bancjis, pueste e privâts che a cambiin i bêçs (Alessio Potocco, Cui euros in Slovenie)
   Sin. compens , davê , percentuâl , ricompense
4. s.f. grup di personis che al à di davuelzi ciertis funzions o une incjarie lavorant adun, esaminant, cjapant decisions o dant conseis e v.i.:  [il Consei de Provincie di Udin dal 1986] al istituive la comission pe normalizazion de grafie de lenghe e al ricognosseve il risultât des sôs decisions (Adrian Cescje, Memoriis di politiche linguistiche); i "progjets" di autonomie a restarin turclâts e disvuedâts par ordin che a passavin di une Comission a chê altre (Josef Marchet, Autonomie e moralitât); nol è timp di pierdi, i fruts dal esam a son che a spietin, la comission ancje, bisugne jentrâ subite e tacâ i esams de scuele (Alan Brusini, Amîs come prime)
   Sin. coleç , comitât , consei , delegazion , deputazion , jurie , zonte