provincie /-vì-/ pro|vin|ci|e [FO]
- s.f. [TS] stor. te antichitât romane, teritori concuistât di Rome e metût sot la jurisdizion di un alt funzionari: daspò dal 150 p. di C. si zontin ancje la provincie di Macedonie (che e veve sot ancje la Grecie) e chê di Afriche (che e jere formade di une part dai dominis di Cartagjin […]) (Sandri Carrozzo, La struture politiche e sociâl romane)
- s.f. teritori e organisim teritoriâl cun autonomie aministrative, cun competencis diviersis a seconde dal lûc e dal moment storic, che te Republiche Taliane al è nivel di mieç tra comun e regjon: Aquilee si cjate in provincie di Udin e in diocesi di Gurize (Francesc Placerean, Pe unitât di glesie in Friûl); a legjiferâ e jere la Diete de Provincie, o Land: da cjâf al jere il cjapitani provinciâl, nomenât dal Imperadôr jenfri i elets (Ferruccio Tassin, Autonomie tal Friûl austriac); il prin nucli agricul popolât di un grup avonde grues di contadins furlans al è nassût no tant lontan di Reconquista, tal Nord de provincie di Santa Fe (Javier Grossutti, La emigrazion dal Friûl - Vignesie Julie in Argjentine e in Uruguay); lis provinciis dal Canadà e da la Australie a son scuasi come stâts federâts (Josef Marchet, Trê salts tal scûr: costituzion - republiche - autonomie)
- s.f. complès dai paîs piçui o des citâts mancul impuartantis, spec. cun riferiment al fat che si dîs che a son indaûr a nivel culturâl e sociâl rispiet ae realtât plui urbane: il politicantut di provincie che al rive adore di deventâ conseîr comunâl o deputât, se nol vûl tornâ indaûr, al scugnarà consegnâ la sô cussience civîl ae direzion dal partît (Josef Marchet, Dissipline); un editoriâl cu lis solitis su la delincuence che a no rispiete plui nancje la provincie (no 'nd è plui religjon) (Sandri Di Suald, Ah! la provincie)