Dizionari de Lenghe Furlane

ale  a|le  [FO]

1. s.f. orghin dal svol dai uciei o ancje di altris animâi:  il colomp, par un moment, al restave incjantât, al bateve lis alis par tornâlis a industriâ (Maria Forte, Cjase di Dalban); la pavee cu lis alis come l'arc di sant Marc (Franca Mainardis, Un bosc cence colôrs); il fol sgangagnât al someave un gnotul cu lis alis a bandon (Alan Brusini, Come tai romançs)
   Var. svuale
   
   1. (fig.) ce che al permet di svolâ, ancje in sens metaforic:  al è un film che al svole su lis alis de spontaneitât (Fabian Ros, Festival di Pesaro 50+1); suns che a menin il scoltadôr come intune sorte di flabe, suns che a fasin svolâ su lis alis de fantasie (Checo Tam, Cocteau Twins su Netun (ma no il planet))
2. s.f. tai di cjar dai uciei, che al corispuint al lôr orghin par svolâ:  o vin mangjât une mignestrine di fidelins, mieze ale di poleç, un panetin fof (Arturo Feruglio, Viaç a Vignesie)
3. s.f. [CO, TS] aer. part dal avion che e fâs di sostegn aerodinamic:  l'avion al cjapave scûr e aiar tes alis viertis (Maria Forte, Cjase di Dalban); o sin stâts colpîts te ale di man çampe! (Checo Tam, Sense)
4. s.f. orghin di moviment dai pes:  [i pes] a movevin a pene a pene lis alis (Lucio Perès, A pescje tal suei)
   Sin. alute
5. s.f. (fig.) situazion protete, controlade, ma ancje sometude a une autoritât:  lui al vûl ducj cuiets e mugnestris sot lis alis dal Imperial Regio Governo (Alviero Negro, Int di masnade); a rivavin des vilis lontanis, cressudis sot lis alis de Plêf antighe (Dino Virgili, La aghe da pît la cleve)
   Sin. difese , favôr , protezion , ripâr , sotet
6. s.f. part dal cjapiel che si slargje infûr:  - Bundì, siôr cont - cu la man dongje la ale dal cjapiel, parcè che e je creance saludâ (Dino Virgili, La aghe da pît la cleve)
   Cfr. cjapiel , frontin , visiere , cube , fonts , gale¹
7. s.f. part laterâl o che e da infûr di un alc:  la fabriche e lassave viodi i segns de violence: une ale sdrumade dal fûc, i veris dai barcons ducj fracassâts (Pieri Menis, Sul agâr); si à cirût di fâ sunâ chei grups che a volevin intune des dôs alis dal capanon o pûr ancje tai doi tendons (Checo Tam, La maree nere)
   Sin. bande , braç , branc
   
   1. part di un orghin anatomic:  une ale di polmon; une ale di fiât; al tornà a tirâ flât cuiet, justa che al moveva li ali dal nâs (Novella Cantarutti, La not di Gjoriu)
   2. ognidune des parts di alc che si divît o che si spartìs in doi o in plui di doi:  dôs alis di cjavei plens di brilantine (Carlo Sgorlon, Ombris tal infinît)
8. s.f. [CO, TS] edil. ogni plan inclinât dal cuviert:  al jere ancjemò frediç sot chê ale di tet mâl dât dongje (Dino Virgili, La aghe da pît la cleve); il gjat, passant dongje dal stali di mestri 'Sef, a si decît a sgripiâsi sù pal tet, che cu lis alis di paie al tocjave cuasi par tiere (Luigi Gortani, Il prin gjat a Glemone)
   Sin. aghe , plovê
9. s.f. part di un barcon o di une puarte che si cumbine cul telâr:  lis frutatis si intardin […], si fermin sot une ale di puarton a ridi a fuart (Dino Virgili, La aghe da pît la cleve)
10. s.f. [TS] milit. part laterâl di un esercit tal cjamp di bataie
11. s.f. tal lengaç politic, piçule fazion dentri di un partît o di un moviment:  il no dal re piemontês aes cinc domandis fatis indenant dal Parlament sart al da plui fuarce ae ale radicâl dal moviment patriotic (Carli Pup, Oms di libertât)
    Sin. bande , fazion
12. s.f. [TS] sport fasse laterâl tun cjamp di balon o di altris sports di scuadre:  o vin provât a butâ jù la nazionâl di chenti di simpri: in puarte Dino Zoff, difese a cuatri cun Tarcisio Burgnich, Fulvio Collovati, Ivano Blason e Alfredo Foni; su lis alis Gino Colaussi e Ezio Pascutti […] (Feliciano Medeot, Zuiadôrs furlans te storie de nazionâl di balon)
    
    1. zuiadôr che al zuie in chê zone dal cjamp:  o vevin une ale diestre, un pitinin piavot, che al jere vignût a fâ il militâr culì di nô e cumò al zuiave ancjimò cun nô (Laurin Zuan Nardin, Il pari)
13. s.f. contor di clâr che si viôt ator di une lûs:  il pavêr dal ferâl al veve une ale curte di lusôr (Maria Forte, Sul cjar di Pauli Gurin)
14. s.f. sensazion no masse ben definide causade di alc o di cualchidun:  chês vôs, cussì, di colp, in chel cidin di lune, a metin intor ne sì ne no, une ale di contentece, une vene di ligrie (Dino Virgili, Sabide di fruts); cemût mai cheste ale di misteri? (Dree Venier, Lis peraulis furlanis spiegadis… par inglês)
    Sin. ombre , atmosfere , clime , espression , lûs , ande
15. s.f. ande di superioritât:  al alçà il cerneli e vie cul stomi infûr, cuntune ale di braùre (Dino Virgili, La aghe da pît la cleve); ce ale, eh, chei Batistons! (Dino Virgili, La aghe da pît la cleve)
    Sin. paronance , prepotence , presunzion , ande

Polirematichis e espressions idiomatichis

• alçâ lis alis loc.v.
• fâ ale loc.v.
• fâ alis loc.v.
• fâ di ale loc.v.
• mangjâ une ale di fiât loc.v.
• sbassâ lis alis loc.v.
• svolâ cence alis loc.v.
• taiâ lis alis loc.v.
• tirâ la ale loc.v.

Proverbis:

• cui che al scjampe al à lis alis
• la gjambe dal poleç e la ale dal cjapon
• o vin une ale di pâs e une di salût
• prin di dî une peraule, bisugne bati la ale tant che il gjal