Dizionari de Lenghe Furlane

aghe  a|ghe  [FO]

1. s.f. licuit naturâl fat di doi atoms di idrogjen e un di ossigjen, che in purece al è cence colôr, cence savôr e cence odôr, indispensabil pe vite su la Tiere:  "Vûstu un altri cafè?" mi domandave. "No, gracie, pitost une tace di aghe" (Alan Brusini, Gian Paolo Linda, I forescj); si viodeve aghe che a spissulave di une fontanute e arbui frindôs (Agnul di Spere, Un sorbet di limon); il cuarp uman al è componût almancul al 60 par cent di aghe, ma ogni dì traviers il sudôr, la urine, la respirazion a vegnin pierdûts plui di doi litris di aghe (Guglielmo Pitzalis, Mangje san 2)
   
   1. dispès tant che tiermin di paragon par clarece, purece, netisie e v.i.:  peraulis lampidis come la aghe monde (Maria Forte, Cjase di Dalban)
2. s.f. ploie:  cenonè e à tacât a vignì jù tante di chê aghe […] (Luciano Marinig, Il sut tra lis dôs Madonis)
   Sin. montane , scjas¹ , scravaç , sglavin , sglavine , ploie
3. s.f. licuit propri dai vegjetâi o di robis di mangjâ:  lassâ polsâ lis fetis di melanzane cuntun pôc di sâl grues, par che a butin fûr la aghe
   Sin. aghiç , aghice
   
   1. sûc strucât fûr di ciertis pomis:  ûstu un sorbet? Une aghe di limon? (Pieri Çorut, La sdavasse)
4. s.f. non gjeneric par prodots distilâts, infusions, decots, tinturis, cosmetics e v.i.:  lis feminis dai curtîi vicins i àn puartâts decots di jerbis, pladinis di aghe di malvis par fâ impacs su lis plaiis (Pieri Menis, Vigji il cuintribandîr)
5. s.f. [CO, TS] med. licuit di un organisim animâl, ancje uman, in cundizions normâls o patologjichis:  il miedi i à gjavade la aghe trê voltis (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
6. s.f. (coloc.) urine:  [tal lager] il sît par spandi la aghe e lâ di cuarp e je une fuesse a la vierte (Ivano Urli, Storie di Min)
   Sin. pisse , pissin , pis , pissade , 'sisin , roie
7. s.f. intai zûcs dai fruts, massime te gjate vuarbe, in oposizion a fûc, si jal dîs a cui che al cîr alc di platât se chest al è lontan:  aghe, aghe… lusignutis…. fûc!
8. s.f. non gjeneric di flum, riul, flumere, canâl e v.i. o ancje dal mâr:  la Livence e je une aghe cuiete (Dino Virgili, Un riul tra Venit e Friûl); in carete e rivin su lis gravis dal Taiament. E passin la aghe su la barcje (Arturo Feruglio, I stivâi di Zuan Batiste)
9. s.f. (par anton.) ancje cun iniz.maiusc., il Tiliment, massime pe sô carateristiche di dividi il Friûl centriorientâl di chel ocidentâl:  a puartavin la cjarie jù par Sant Denêl e di là da la aghe (Pieri Menis, Vigji il cuintribandîr)
10. s.f. [CO, TS] edil. ogni plan inclinât dal cuviert:  il puarti al è stât rifat intal secul passât [...] cun tet a trê aghis (Antoni Beline, Sant Jacum, là che al finìs il mont)
    Sin. ale , plovê
11. s.f. [CO] (fig.) tal pl., situazion:  "Oh sant Antoni benedet, in ce aghis che soi colât!" (Luîs Merlo, Puor Naziut)

Polirematichis e espressions idiomatichis

• aghe al cuel loc.v.
• aghe al cûl loc.v.
• aghe alte loc.s.f.
• aghe basse loc.s.f.
• aghe benedete loc.s.f.
• aghe benedide loc.s.f.
• aghe clope loc.s.f.
• aghe di bonodôr loc.s.f.
• aghe di colonie loc.s.f.
• aghe di vite¹ loc.s.f.
• aghe di vite² loc.s.f.
• aghe dolce loc.s.f.
• aghe grande loc.s.f.
• aghe in bocje loc.inter., loc.s.f.
• aghe passade loc.s.f.
• aghe ploiane loc.s.f.
• aghe pudie loc.s.f.
• aghe salade loc.s.f.
• aghe salse loc.s.f.
• aghe sante loc.s.f.
• bevi lis aghis loc.v.
• buse ta la aghe s.f.
• cuintri aghe loc.av., loc.adi.inv.
• cul cûr in aghe loc.av., loc.adi.inv.
• di ca da la aghe loc.av., loc.adi.inv.
• di là da la aghe loc.av., loc.adi.inv.
• di là da la aghe grande loc.av.
• discjadude di aghe s.f.
• disfâsi come il sâl ta la aghe loc.v.
• disfâsi tant che il sâl ta la aghe loc.v.
• fâ aghe loc.v.
• fâ la aghe loc.v.
• fâ une buse ta la aghe loc.s.f.
• fâ vignî la aghe in bocje loc.v.
• fâ vignî la aghe tai zenoi loc.v.
• fenoli di aghe loc.s.m.
• in aghe loc.adi.inv.
• inneâsi intun vignarûl di aghe loc.v.
• inneâsi intune tace di aghe loc.v.
• lâ come il sâl ta la aghe loc.v.
• lâ il sanc in aghe loc.
• lassâ cori la aghe injù e il fum insù loc.v.
• lassâ cori la aghe pal so canâl loc.v.
• meti fiers in aghe loc.v.
• meti i fiers in aghe loc.v.
• movi la aghe ferme loc.v.
• movi lis aghis loc.v.
• pan e aghe loc.
• puartâ aghe al mâr loc.v.
• puartâ la aghe cu la orele loc.v.
• puartâ la aghe cu lis orelis loc.v.
• rompisi lis aghis loc.
• scjassâ la aghe dal stomi loc.v.
• sot aghe loc.av., loc.adi.inv.
• tirâ la aghe loc.v.
• tirâ la aghe al so mulin loc.v.
• vignî la aghe in bocje loc.v.

Proverbis:

• a balâ cu la sô femine, sopis ta la aghe
• a pestâ aghe tal mortâl, ancje daspò siet agns e jes aghe
• aghe cidine e puarte ruvine
• aghe cidine e ruvine i puints, lime sordine e ruvine lis cjasis
• aghe e pan, mangjâ di cjan
• aghe e vidriûl si fâs vin par dut il Friûl
• aghe lontane no distude fûc
• aghe passade no masane
• aghe passade no masane plui
• aghe peste, aghe e reste
• aghe, diete e serviziâl fâs vuarî di ogni mâl
• al è il 'sâf che al à simpri pôre che i mancji la aghe
• al è miôr cjaminâ trê dîs par tiere che no miezore par la aghe
• al tocje di lassâ lâ la aghe injù e il fum insù
• ancje la aghe sporcje e distude la sêt
• beâts i prins fûr che jù par la aghe
• bêf il vin e lasse la aghe pal mulin
• bisugne fâ la roste denant che e vegni la aghe
• bisugne inneâsi tal mâr grant, no je nancje braùre a inneâsi intune tace di aghe
• bisugne lâ a mulin cuant che e je aghe
• bisugne lassâ lâ la aghe injù e il fum insù
• cence aghe no si masane
• cuant che a fasin mâl i cai, la aghe no mancje mai
• cuant che il poç al è sut, si sa trop che e vâl la aghe
• cuant che si va jù par la aghe, si cjapisi pai baraçs se no si po altri
• cui che al è scotât ta la aghe cjalde al à pôre di chê frede
• cui che al vûl aghe che al ledi a la fontane
• cul vin si sta tra amîs, cu la aghe si lave i pîts
• cun zeis no si va a cjoli aghe
• da la aghe si cjape il pes, dal fûc nuie
• dai poleçs si vuarìs cu la aghe dai ûfs di Pasche
• dal poç si gjave la aghe
• daspò tancj agns e tant timp la aghe a torne al so mulin
• doi viaçs dongje la aghe, trê tal mulin, e un di vicin
• ducj tire la aghe al so mulin
• i cops si dan la aghe un cul altri
• i rîs a nassin ta la aghe, e àn di inneâsi tal vin
• il sanc nol è aghe
• il Signôr al à aghe par bagnâ ducj
• in cent agns e cent dîs la aghe a torne ai siei paîs
• la aghe a lave dut
• la aghe a va simpri al mâr
• la aghe cidine a fâs marcî i pâi
• la aghe dulà che e je stade e po tornâ
• la aghe dulà che e jere, e torne
• la aghe e il fûc a stan in pôc lûc
• la aghe e je fate par lavâsi
• la aghe e je fate pes 'savis
• la aghe e je un trist confuart
• la aghe e ruvine i puints e il vin il cjâf
• la aghe e va injù, il fum insù e la fortune par traviers
• la aghe in bocje a distude il fûc
• la aghe no à ramaçs
• la aghe no cor simpri par chel agâr
• la aghe no coste bêçs
• la aghe no fâs magle
• la aghe no piert mai i siei dirits
• la aghe no suie
• la aghe prin di bulî e cise
• la aghe sporcje no lave
• la cjase dai contents e je lade jù par la aghe
• lasse che il fum al ledi insù e la aghe injù
• lasse che la aghe a cori pal so mulin
• lasse lâ la aghe al so destin
• lasse lâ la aghe injù e il fum insù
• miôr scjaveç che no aghe
• miôr vin turbit che no aghe clare
• neâsi simpri ta la aghe grande
• no bisugne spietâ la aghe al cûl
• ogni mulin al à la sô aghe
• ogni mulin al vûl la sô aghe
• pan pe fam, aghe pe sêt e jet pe sium
• par distudâ il fûc ogni aghe e je buine
• puartâ aghe al mâr
• sanc nol è aghe ni brût di fasûi
• Sant Gregori pape la cisile a passe la aghe, passâ o no passâ e je ore di arâ
• se il draç nol ten aghe, al reste bagnât
• se si à di inneâsi, inneâsi ta la aghe grande
• se si à di inneâsi, lâ simpri ta la aghe grande; no je nancje braùre a inneâsi intune tace di aghe
• si à di fâ la roste prin che a vegni la aghe
• si dîs dôs voltis dongje da la aghe e trê tal mulin
• tiere sante e aghe sante a fasin pantan
• vin, aghe e fûc a son bogns, se no si ju lasse deventâ parons