paronance
/-àn-/
pa|ro|nan|ce
[AF]
-
s.f.
il jessi paron, il vê in proprietât, la cundizion di cui che al è paron:
cuant che i nestris paîs a jerin bielzà plantâts cun int dal nestri stamp, lôr [i pagans] a vevin ancjemò paronance espotiche di cualchi sît (Josef Cjargnel, I pagans di Muine)
-
complès di ce che al è di proprietât di un paron:
la paronance dal Cont, prime rote da tantis isulis di domini patriarcjâl, e finì, un pôc a la volte, cul ridusisi in cualchi isule pierdude tal teritori dipendent dal Patriarcje (Josef Marchet, Cuintristorie dal Friûl fin sot la Italie);
di dute la paronance no i restà che la strade di lâ a Messe (Maria Forte, I arcs)
-
(fig.)
ancje riferît a un subiet astrat, il jessi paron o il dominâ ancje alc di imateriâl:
la sô vocazion platade a la fedeltât e vignive fûr prepotente, cjapant une paronance totâl dal so spirt (Carlo Sgorlon, Il dolfin);
son chei voi che àn cuistât la paronance / sore di me, son lôr che mi àn striât (Ercole Carletti, A Nene)
-
s.f.
[BF]
coletîf dai parons, di chei che a àn proprietâts:
lui, om cressût a la antighe, cu la sudizion e il rispiet pe paronance, cjatâsi a sintî un discors di chê fate! (Domeni Zannier, La crete che no vai);
la paronance no si saveve cuant che e jere començade; si piardeve tai timps. Si sintive a dî che di secui e secui indaûr lôr a jerin stâts simpri parons (Riedo Pup, I furlans e i parons)
-
s.f.
ande di cui che si sint paron, ancje cence rispiet di chei altris:
a imparavin a adatâsi, a vivi insiemi cence tantis paronancis, a fâ la part dal lôr dovê cence tantis crestis e tancj capricis (Josef Marchet, Lis predicjis dal muini)
Sin. prepotence
-
s.f.
il cognossi alc e il savê tratâ o doprâ cun proprietât e sigurece:
al veve scomençât a dâ une man te traduzion pre Antoni Beline, che al veve une paronance straordenarie e spontanie de lenghe (Adrian Cescje, Memoriis di politiche linguistiche);
dopo un pâr di agns, co al finì il cors, al veve cuistât une buine cognossince dai stîi des costruzions e une paronance tal tratâ lapis e scuaris (Lucio Perès, Il mâl dal mûr)
Sin. domini