Dizionari de Lenghe Furlane

disgracie  /-à-/  dis|gra|ci|e  [FO]

1. s.f. fat une vore negatîf, contrari, che no si previôt o che no si pues fâ nuie par parâsi:  in chest mont, ogni volte che nus capite une disgracie, no si rive mai adore di savê se e je une fortune o se je une autentiche disgracie (Francesc Placerean, Il Friûl taramotât al à bisugne di ducj, ma al à di aministrâsi di bessôl); inte famee, cualchi volte, sedi par disgraciis sedi par separazions, al ven a mancjâ cualchidun (AAVV, Sul florî)
   Sin. batidure , copete , disdite , disfortune , flagjel , fracassine , malan , maldestin , malefin , malepasche , montafin , ribaltament , ribalton , savoltament , savolton , tragjedie
   Var. disgrazie
   
   1. (fig., iperb.) ancje fat di pocje gravitât che però al da fastidi:  cumò al è il telefon che nol va: pussibil mo, che vuê a sedin nome disgraciis; riduçant di sot coç, i rispuindè: "No us aio simpri dit, jo, che i forescj a puartin nome disgraciis?" (Roberto Ongaro, Cretevierte); fastidi
      Sin. intric , fastidi , malan , berdei , casin , rogne
2. s.f. cundizion di pene, dolôr, torment:  varès dovût pentîsi di chel so sens di plasê inuman che senza savê cimût, veva pûr provât nel contemplâ la disgrazia di chei infeliçs (Federigo Comelli, Il me paîs); in doi si à plui coragjo tal frontâ i lambics de vite, che, a meti adun dôs disgraciis, si trai confuart (Alan Brusini, Amîs come prime)
   Sin. danazion , persecuzion
3. s.f. (fig.) persone o robe che no si pues sopuartâ, che no si à nissune stime, che si calcole in maniere negative e v.i.:  par fuarce che in chel ufici nol funzione nuie, a àn un diretôr che al è une disgracie
   Sin. disastri , fisc , insidie , disgraciât , Diu nus vuardi , flagjel , porco dîs , orcodindio
   
   1. persone imberdeade che e fâs simpri cualchi dam, ancje tant che apelatîf scherçôs:  chel fi al è une disgracie, a 'ndi fâs simpri une; dai mo, ven ca disgracie, che o viodìn di fâ insiemi
      Sin. fisc , insidie , disastri , disgraciât , Diu nus vuardi , slapagnot , pastrocjon , imbranât , sapai , disperazion , porco dîs , orcodindio
4. s.f. fortune contrarie:  se si le cope [la magne] e puarte disgracie e in curt al murirà cui che le à copade o un de sô famee (Sandri Carrozzo, Friûl di Magance)
   Sin. disfortune , maldestin , malesorte , peule , sgnesule , sgumilicje

Proverbis:

• a spandi sâl a vegnin disgraciis
• a spandi vueli, a tocjin disgraciis
• bilite passant, disgracie vignint
• cuant che a scomencin lis disgraciis bisugne vierzi puartis e barcons
• cui che al cjape il lot al cjape disgracie
• cui che al gjolt dal mâl dai altris co a vegnin lis disgraciis al vai di bessôl
• dôs disgraciis a son siguris: la muart e lis tassis
• l'uciel in man al frut, la surîs in bocje al gjat, lis disgraciis in man al avocat
• la disgracie di un e je la fortune di un altri
• la fortune di un e je la disgracie di un altri
• lis disgraciis a fasin fâ trop
• lis disgraciis a menin judizi
• lis disgraciis a son un trist companadi
• lis disgraciis a son une triste scuele
• lis disgraciis a stan simpri prontis tant che lis taulis in ostarie
• lis disgraciis a van tant che i fraris
• lis disgraciis no fasin bon bevi
• lis disgraciis no van mai solis
• no je mai une disgracie che no sedi une fortune
• tes disgraciis si cognòs cui che al vûl ben
• tes disgraciis si cognòs i amîs