peule
/pè-/
peu|le/pe|u|le
[CO]
-
s.f.
sostance tacadice, pal solit nere, otignude par distilazion di pês, lens, catrams e v.i. e doprade pal solit par impermeabilizâ o protezi materiâi, une volte tant che combustibil, o tant che materie prime ancje te industrie chimiche e farmaceutiche:
[lis fiubis] son di fâlis neris cu la peula. Par fâlis neris bisugna prima scjaldâlis a la lum, dopo si passa sora via cu la peula e cussì ricevin un biel lustri neri (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera);
frecis e claps, vueli e peule bulint / butin aduès di chei besteons rabiôs, / e, in mieç di lôr, l'è il duche che el si bat / da vêr soldât furlan e coragjôs (Bepo Marion, La storie di Gjisulfo e di Romilde)
-
s.f.
(fig.)
persone insistente e fastidiose, che e intrighe, che e impedìs di fâ alc:
Guri al cor da pît, al fâs doi scjalins insù a domandâ cemût, i va daûrji a Rosute che e ven a cjoli aghe in primure cu la bocalete. Tancj pas jê e tancj Guri. "Ma peule di omp…" (Dino Virgili, La aghe da pît la cleve)
Sin. intric
, intrigatori
, tenticul
-
s.f.
(fig.)
robe materiâl o imateriâl che e fâs di impediment:
noaltris, cundut il marum che al ven sù a viodi tancj furlans bielzà impeolâts di chê stesse peule [dal malcostum talian], o vin ancjimò un fregul di fede te nestre int (Josef Marchet, Consuntîfs)
-
s.f.
(fig., pop.)
disfortune, sorte contrarie o fat caraterizât di sorte contrarie:
tal doman Turo al veva cjapât la cartulina da clamada. Una peula chel dovê lâ via pena imbastida la biela stagjon dal amôr (Celso Macôr, Lilì Marlene);
lis cometis a jerin opare dal diaul e dome a cjalâlis a puartavin peule, malatiis, pestilencis, cjaristie e vueris (Bepi Zefon, Lis stelis cometis)
Sin. sfortune
, disfortune
, male sorte
, disgracie
, scalogne
