Dizionari de Lenghe Furlane

cussience  /-èn-/  cu|ssi|en|ce  [FO]

1. s.f. facoltât e ativitât di comprension, di percezion razionâl di se stes e di ce che al è ator:  mil scrupui a scomençarin a ruvinâi la anime ancje a lui… E al capì tantis robis miôr di mai… Come il madurîsi di une cussience… il nassi di un altri dentri di se (Maria Forte, Cjase di Dalban); Min al veve plene cussience di ce che cumò si presentave denant di lui: un an, doi, forsit dîs (che Diu nus deliberi!) di vueit e di scûr (Franca Mainardis, Aiar di cjase); ducj a condividevin la cussience che in Friûl no fos democrazie informative e che si veve di movisi par cambiâ lis robis (Max Mauro, Un Friûl difarent: i 90 mhz di Onde Furlane)
   Sin. cognossince , concet , criteri , idee , lum de reson , percezion , sensibilitât , sintiment
   Var. cussienzie , cossience
   
   1. psic. funzion psichiche indulà che si dan dongje dutis lis esperiencis e lis cognossincis di une persone:  secont Metzinger (2010) lis personis intai insiums a pierdin la pussibilitât di agjî cun cussience, ven a stâi che la persone no je plui parone, cun cussience e intenzion, des sôs azions (Anastasia Fabbro, Franc Fari, Sui insiums di Aelius Aristides: une analisi neuropsicologjiche)
   2. filos. situazion che la anime e je in rapuart cun se stesse e e pues cognossisi e judicâsi in maniere direte e cence fal
2. s.f. cognossince dal valôr morâl di ce che al è ben e di ce che al è mâl:  int cence cussience che e robe, e sassine e violente (Riedo Pup, Delincuents si devente)
   Sin. anime , criteri , judizi , sintiment
   
   1. complès dai principiis morâi o la sensibilitât morâl che e indrece lis sieltis e lis azions:  voaltris o vais daûr de vuestre cussience, ma lôr a van daûr dal lôr interès, dal lôr tornecont…, sigûrs di jessi sostignûts ancje a Udin… Tant al è vêr che a àn za decidût di fâ la aste e le fasin…, cence abadâ ae cussience (Alviero Negro, Int di masnade)
   2. facoltât e ativitât di stazâ e dâ judizi su di une azion che si à fat o su se stes:  cuant che un al ven tocjât sul so, al piert dut il sens de justizie e dal dirit dal prossim, che a son, in timp di vuere, za dôs robis scomudis pe cussience di ognidun e massime par chê di un soldât (Roberto Ongaro, Cretevierte); si trate tantis voltis di vêrs delincuents e di canaiots, che si cjamin la cussience di colpis, di vergognis, di birbantariis (Josef Marchet, Lis predicjis dal muini); scoltâ la vôs de cussience
   3. ogni persone tant che entitât morâl:  o soi simpri restât convinçût che par otignî alc di rivoluzionari (e la tutele des nazionalitâts dineadis e jere alc di rivoluzionari) bisugnave prin scjassâ lis cussiencis conformistis e procurâ in chês cualchi creture (Adrian Cescje, Memoriis di politiche linguistiche)
3. s.f. onestât, sens dal dovê e de responsabilitât intal fâ un lavôr:  adulà sono i umign nestris che e puedin meti man, cun cussience, cun preparazion e cun responsabilitât a dutis lis cuistions di dirit public e internazionâl, di legjislazion costituzionâl, economiche, finanziarie, scolastiche, aministrative e burocratiche che a van disberdeadis? (Josef Marchet, Fûr cui che i tocje)
   Sin. competence , cristianitât , curie¹ , diligjence , dreture , impegn , onestât , premure , probetât , responsabilitât , rigôr , scletece , scrupul , serietât
4. s.f. sensibilitât viers cierts problemis:  plui che la cussience ambientâl de int e je alte, plui che si pues sparagnâ risorsis e energjie
   Sin. interès , sensibilitât
5. s.f. il vê atenzion, scrupul:  sielzi cun cussience
   Sin. atenzion , cure , curie¹ , diligjence , dreture , lealtât , onestât , rivuart¹ , scrupul , serietât , sintiment

Polirematichis e espressions idiomatichis

• scjassâ la cussience loc.v.
• vê la cussience nete loc.v.
• vê su la cussience loc.v.

Proverbis:

• a vê pure la cussience, ogni ben si po spietâ
• il malât nol à cussience pal san
• il miôr cussignel e je la cussience nete
• la cussience e je inneade tal poç
• la cussience le à mangjade la vacje
• la cussience nete e je un bon cjaveçâl
• la cussience si è inneade te Tor