Dizionari de Lenghe Furlane

cure  cu|re  [FO]

1. s.f. tratament che si fâs a un malât par che al vuarissi o cuintri di une malatie par che e passi:  ce che al covente pe cure dal diabete a son la educazion terapeutiche, la diete, la ativitât fisiche e lis medisinis (Guglielmo Pitzalis, Curâ il diabete); une vore di studis sperimentâi a àn mostrât la utilitât di cheste tecniche inte cure des malatiis gravis e soredut par frontâ il malstâ e il dolôr sei fisic sei psicologjic (Franc Fari, Neurosiencis de meditazion)
   Sin. medecule , medisine , terapie , tratament
   
   1. rapuart continuatîf di un miedi cuntun malât:  jessi in cure di un cardiolic; vê in cure un pazient
      Sin. medecule , medisine , terapie , tratament
   2. aplicazion des medisinis:  finide la cure nol varà plui problemis
      Sin. terapie , tratament
   3. (fig.) cuantitât di alc che e finìs par stufâ:  in montagne po jo no sarès tornât nancje in fotografie, parcè che di montagne sot la naie o vevi fate une cure che mi jesseve pai voi (Alan Brusini, Amîs come prime)
      Sin. dose
2. s.f. medisine che si à di cjapâ par vie retâl:  meti une cure di glicerine al frut
   Sin. suposte
3. s.f. (fig.) robe che e à la forme e la dimension che si somee cun chê medisine:  Ane e spietave che lis feminis a lassassin i lavadôrs par cori jù a lavâ doprant dutis lis curis di savon cjatadis ca e là (Maria Forte, La aghe dal Ariul)
4. s.f. (fig.) robe che e fâs ben, azion a pro di alc o di cdn. o cuintri di alc di negatîf:  i siôrs a passavin zornadis di paradîs tai lôr zardins plens di rosis frescjis e di pomis sauridis. E in pocjis setemanis di chê cure li a tornavin gnûfs tal cuarp e ta la anime (Riedo Pup, I furlans e lis feriis); cuintri il mâl dal nazionalisim e de presunzion de raze nol esist ni vacine ni cure (Angelo Floramo, Cuintristorie dal Nûfcent 1930-1940)
   Sin. difese , medisine , rimiedi
5. s.f. preparazion di robe di mangjâ o di prodots li che si gjave il scart
6. s.f. precision, finece tal fâ alc:  nissun nol à studiât il manuscrit daspò di Böhmer (che nancje lui no lu veve scrutinât cun cure, parcè che lu date al secul XIX cence meti l'an […]) (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie); no podei sul moment fâ une ricercje e o pensai par intant di custodî il materiâl cun cure (Lucio Perès, Une lance longobarde cjatade a Baracêt)
   Sin. detai , diligjence , impegn , precision , scrupul , curie²
   
   1. cualitât di ce che al è fat cun precision e impegn:  valutâ la cure di un lavôr
7. s.f. interessament particolâr:  nancje Rosute cun dute la sô gracie, la sô cure, il so afiet no rivave adore di capî a colp chês robis (Dino Virgili, La aghe da pît la cleve); l'episodi di Jone che al polse al riclame la cure e la misericordie di Diu par chei di Ninive (Giovanni Battauz, Flavio Cossar, Renato Iacumin, I mosaics de basiliche di Aquilee)
   Sin. considerazion , curie² , interessament , premure
8. s.f. ancje pl., ativitât di controlâ la condote di une o plui personis, par che no fasin nuie di mâl par se stes e par chei altris e par che a stedin ben o a cressin ben:  o scomençai a sintî par Jole une tenarece pietose, e a pensâ che aromai tra di nô lis parts si jerin ribaltadis. No jere jê che e veve di viodi di me, o jeri jo, pluitost, che o scugnivi vê cure di jê (Carlo Sgorlon, Il dolfin)
   Sin. control , responsabilitât , vuardie
9. s.f. ativitât di viodi e di stâ atents di alc e di fâ ce che al covente par che al vegni ben:  a forin ancje i agns che si tacarin a implantâ morârs pal arlevament dai cavalîrs inte fasse pedemontane, che e domandave la vore massime di feminis e fruts pe lôr cure (Adrian Cescje, Liniis di storie sociâl e economiche dal Friûl 1500 - 1800)
   
   1. ativitât di controlâ e di di fâ lis sieltis che a coventin di maniere di tutelâ un interès:  la cure de buine aministrazion de societât e je responsabilitât dal president e dai conseîrs
      Sin. aministrazion , control , guvier , direzion , gjestion
   2. preparazion di un test pe sô publicazion
10. s.f. ecl. comunitât di fedêi che e je afidade a un predi
    Sin. cure di animis

Polirematichis e espressions idiomatichis

• a cure di loc.prep.
• par cure di loc.prep.
• vê cure loc.v.

Proverbis:

• tu fâs ce che tu puedis e lassii a Diu cure dal rest