competence
/-èn-/
com|pe|ten|ce
[FO]
-
s.f.
cognossince e capacitât di fâ ben intun ciert cjamp, intune cierte ativitât:
in zornade di vuê e mancje une classe dirigjente che e vebi esperience e competence (Josef Marchet, Fûr cui che i tocje);
di une bande al mostre che si pues fâ cul furlan ancje informazion di stîl "professionâl", di chê altre al fâs intindi che "chei di Onde Furlane" a àn des competencis sul furlan che nissun, almancul fin a chel moment, al à (Max Mauro, Un Friûl difarent: i 90 mhz di Onde Furlane);
il prenar al fevelave di caloriis cu la competence di un inzegnîr di fondarie (Roberto Ongaro, Cretevierte);
jo, dal alt de mê competence di espert, di ordenât, di contabil e dut, i disevi che, a front dal impegn, e considerât che aromai no si veve nuie altri de bande, tocjave strenzisi, misurâsi tes compris, tai spas, tai vistîts, par podê rivâ adore a rispuindi ai dovês cence lâ in displasês (Meni Ucel, Culumiis)
Sin. capacitât
, esperience
, mistîr
, man
, savê2
Var. competenzie
-
s.f.
[CO, TS]
burocr., dir.
podê di mandâ fûr ats juridics:
il regjim doganâl al è intes competencis esclusivis dal Stât (Aministrazion Publiche, Statût Speciâl de Regjon Autonome Friûl-Vignesie Julie);
domandâ «la atribuzion di gnovis competencis par creâ une scuele regjonâl li che la diversitât linguistiche e cjati plene citadinance» (Erika Adami, «Regjon, promôf lis lenghis!»)
-
cjamp di azion di un orghin jurisdizionâl o aministratîf:
un pas a la volte, tra discussions, ricors e barufis, lis competencis e i dirits de Contadinance e dal Parlament a forin stabilîts e ancje lis causis di litigâ a vignirin a mancjâ (Josef Marchet, Cuintristorie dal Friûl fin sot la Italie)
-
s.f.
sume di bêçs che e ven dade a pet di une prestazion, di un servizi e v.i.:
paiâ lis competencis dal avocat
Sin. compens
, onorari
, paie2
, vê di vê