savê2
sa|vê
[FO]
-
s.m.
complès di cognossincis, nozions, informazions:
[i viei] a insegnavin che prime di vierzi bocje bisugne jessi sigûrs di vê une grande risierve di «savê» (Riedo Pup, I furlans e il fevelâ);
Alessandrie di Egjit eleniche e deventà il sît là che e sucedè la racuelte e la conservazion di dut il savê scrit parie cu la leterature che lu veve compagnât (Adrian Cescje, Viaç aes origjins dal Logos);
la division in loci e la lôr ripartizion a jevin il probleme de classificazion de realtât e de sistematizazion dal savê (Mario Turello, Il brevet);
e clamà un vecjo miedi plen di dûl, che si ingropà a viodi chê puare famee dispierdude e al tentà dut il so savê par vuarî la frute (Maria Forte, Cjase di Dalban)
Sin. cognossince
, sapience
, sience
Proverbis:
- ce i zovie la robe al ignorant co nol po comprâ il savê?
- cui che al cjacare pôc al fâs buine figure cun metât di savê
- il masse savê al fâs falâ
- il savê nol sta sul stomi
- la robe ce i zovie al ignorant se nol po cuistâ il savê
- un che al tâs al fâs buine figure cun metât di savê