Dizionari de Lenghe Furlane

rigôr  ri|gôr  [AF]

1. s.m. il jessi dûr, pôc flessibil, soredut in fat di dissipline:  e jere stade tirade sù di sô mari cuntun rigôr morâl di chei a la antighe (Roberto Ongaro, Il muc); [tes casermis] tancj zovins a vivevin come in esili, te solitudin e tal rigôr di regolaments di fier (Carlo Sgorlon, Il dolfin)
   Sin. austeritât , durece , intransigjence , rigjiditât , fermece
   
   1. tal pl., sisteme di imponi la dissipline:  chê sì che e jere une scuele che i leve a plomp. Cence rigôrs, libars di pensâ, di fevelâ e di movisi, di sintîsi oms insome (Alan Brusini, Par stradis lungjis)
2. s.m. precision tal aplicâ la logjiche, la razionalitât o lis normis di une dissipline, di une tecniche e v.i.:  un studi esemplâr, duncje, pal rigôr sientific e pe precision linguistiche (Laurin Zuan Nardin, Angelo Pittana - Lionello Baruzzini, La nomencladure dai animâi, Codroip, 1996)
   Sin. justece , precision , finece
3. s.m. sport tal balon, tîr di punizion o par dispatâ une partide dopo dai timps suplementârs, che un zuiadôr al pues fâ dal discut dai 11 metris te puarte difindude dome dal portîr:  l'arbitri […] i veve sivilât un rigôr a favôr par un fal di man in aree (David Zanirato, Il Carnico di balon si vierç cuntune biele dimostrazion di lealtât sportive)

Polirematichis e espressions idiomatichis

• a rigôr loc.av.
• a rigôr di logjiche loc.av.