Dizionari de Lenghe Furlane

durece  /-rè-/  du|re|ce  [CO]

1. s.f. il vê une cierte resistence ae pression, aes incisions, al tai e sim.:  i someave che ogni robe che al tocjave e fos come di bombâs; nol sintive la forme, nol sintive la durece (Maria Forte, La tiere di Lansing)
   Sin. compatece , fissum , saldece
2. s.f. (fig.) disposizion o maniere di fâ che no je temperade di comprension e atenzion viers chei altris o che e je fintremai violente:  "Dulà lavistu? … Ce âstu non?" i domandà cence durece (Pieri Menis, Sul agâr); o crôt che, in gracie de sô sensibilitât pe musiche e pe poesie […] al vedi morestade la durece dal imperadôr, doprant savietât e ecuilibri (Diego Navarria, Paulin, amì dal imperadôr jenfri Rome e Aquilee)
   Sin. crudece , cruditât , garbure , inclemence , rigôr , sgrimie , tristerie , severitât
   
   1. il jessi fuart, ruspi, grês:  a àn la durece di un complès di heavy-metal e la dolcece tipiche di ciertis formazions de etichete britaniche 4AD (Checo Tam, La maree nere)
      Sin. crudece , garbure , inclemence , rigôr
   2. il jessi dificil, dûr di sopuartâ, di puartâ indevant, di fâ e v.i.:  ancje Bruna e a scugnût frontâle adore la durece de vite (Gianni Gregoricchio, Storie di Ide)
      Sin. crudece , pesantece
3. s.f. (ancje fig.) mancjance di elasticitât, di naturalece, di fluiditât:  [Visintin] al veve ametût par scrit ciertis "durecis" [te traduzion], ma rispiet ae impuartance e ae bielece dal so lavôr, un public onest al sarà dal sigûr pazient (Sandri Carrozzo, Note dal curadôr ae traduzion dal Infier di Dante)
4. s.f. [TS] chim. concentrazion di calci e magnesi ta la aghe