Dizionari de Lenghe Furlane

cors¹  /-ò-/  cors  [FO]

1. s.m. il cori de aghe o di un altri fluit, il complès des aghis in moviment:  un slac di tiere al à fermât il cors di un riu (Mauro Pascolini, Andrea Guaran, La mont furlane); il miedi nol podeve capî ce che e veve, i faseve fâ punturis e al diseve che il sanc nol veve il so cors just (Pieri Somede dai Marcs, A jerin lagrimis); a mieç di chel flus, dal cors principâl al partive un riul plui stret che al leve vie cuintri soreli a mont (Gianfranco Pellegrini, Il drâc)
   Sin. aghe , corentie , corint² , corevul
   
   1. percors di une aghe:  il grues di cheste int si stanziarin dulà che a nassin lis aghis plui grandis: la Donau, la Elbe, il Rain, e dilunc fûr dal cors de Donau fintremai di là di Viene (Josef Marchet, Cuintristorie dal Friûl fin sot la Italie)
      Sin. aghe
2. s.m. grande strade di citât:  un incuintri public tal palaç de provincie, a Gurize, in Cors Italie
   Sin. stradon , stradâl , viâl
3. s.m. [CO, TS] edil. intai mûrs, sucession di elements compagns, massime modons e pieris, metûts a pâr e a nivel su un stes plan orizontâl:  al veve contât trê modons par cors e, stant che i modons a son di vincjecuatri, sumant ancje lis maltis, a davin la misure precise (Roberto Ongaro, Cretevierte)
4. s.m. [CO, TS] gjeol. struture longjitudinâl formade di une sole sorte di cret:  dolomiis scuris e in gjenar ben stratificadis, in cors che a son pal plui tabulârs e centimetrics, cundut che a puedin jessi ancje intercalazions plui finis o plui gruessis e gjeometriis lenticolârs (Francesco Gobbo, Gjeologjie e paleontologjie ator di Preon)
   Sin. filon , strât , cengle
5. s.m. [CO, TS] tess. complès di fîi passâts inte maie di ogni liç
6. s.m. disvilup, procedi, sucedi di alc, soredut in progression:  la funzion e à il so cors, e e ven la ore di don Camilo, plui lustri e plui complen dal solit, pe predicje (Meni Ucel, Otavari a Madone); la justizie e à il so cors (Pieri Piçul, Vieri e gnûf)
   Sin. ande , bot , davuelziment , direzion , evoluzion , flus , orientament , progrès , sens , svilup , tindince , trafile , viers
7. s.m. validitât atuâl:  «Paron», i dîs il scrivant, «jo o pues nome dîus che chê cjarte alì no à plui cors. O vevis di spindile o di cambiâle prin che e las fûr di cors» (Meni Ucel, La vacje)
8. s.m. serie ordenade di lezions o di esercitazions che a àn la finalitât di insegnâ alc:  sul plan gjornalistic Tosoni al viôt un limit de radio chel di jessi masse "Rossi dipendente". Al inmanee cussì un cors di formazion gjornalistiche pai colaboradôrs (Max Mauro, Un Friûl difarent: i 90 mhz di Onde Furlane); propit tal 1344 a son scomençâts i prins cors da la universitât a Cividât (Francesc Placerean, Il nestri sant: patriarcje Bertrant); la Universitât dal Friûl, sotfinanziade come che o savìn, no rive a rinfuarcî i cors di prime formazion, chei che a preparin i/lis mestris de scuele de infanzie e des elementârs (Silvana Fachin Schiavi, I dîs agns de leç n. 482/99)
   Sin. cicli
   
   1. anade di studis, soredut te universitât:  i students dal prin cors
9. s.m. manuâl cun finalitâts didatichis che al ten dentri un complès di lezions su un argoment:  un cors di aprendiment di leture e scriture e di esercitazions di lenghe furlane par arlêfs di scuele medie publicât tal 1999 (Adrian Cescje, Memoriis di politiche linguistiche)
   Sin. manuâl , test , libri
10. s.m. [CO] cicli mestruâl:  no veve vût mai une vite facile come femine: fastidis pai cors, gravidancis che no si concludevin (Giovanni Pillinini, Un cjaldîr plen di aghe)
    Sin. mestruazion , cors di sanc , flus , mâl dal flus , mâl solit , mês¹

Polirematichis e espressions idiomatichis

• intal cors di loc.prep.
• mâl di cors loc.s.m.
• tal cors di loc.prep.

Proverbis:

• ni par baiâ di cjan ni par ronâ di mus nol è stât mai fermât il cors de lune