Dizionari de Lenghe Furlane

cjar¹ cjar [FO]

s.m. mieç di traspuart cun dôs o cuatri ruedis, tirât di animâi: i vignive iniment il so cjar, cu lis ruedis di camion, fuart e lizêr, che al puartave come nuie une cjame di trente cuintâi, e i cjavai di pêl colôr modon (Carlo Sgorlon, Prime di sere); i Bas a vevin za il cjar dai bûs, il caret vecjo e la bare, che il nono Zuantoni e un so barbe Bidin a fasevin i cjaradôrs inmò sot i Antonins, ai timps di Napoleon (Dino Virgili, Il cjaruç dai Bas)
Cfr. bracidure , bar¹ , ruede , cjarpint¹ , as¹ , spine , vermene , capelet , passel , açalin , cjaçuele , cuadrel , paledie , palastre , sies , masele , leam , siessule , stadearie , stadei , gusiele di cjar , taion , codule¹ , jonc , damassadôr , cjavile , tamon , jôf , predêl , cjaviestri , gusiele dal tamon , cjavile de codule , sane , gjambe , scjalâr , paradôr , zaie , bene , cos , rutice , gratule , traviers , sclendare , scjalete , spiron , jubâl , tulugn , tulin , mace di tulugn , bree di scjalâr , bree di denant , bree di daûr , scjalon , prodolarie , tiradôr , jovet , belancin , serpe , bucule , rai¹
s.m. la cjame che e sta o che e pues stâ ta chel mieç di traspuart: culì si veve pensât di taponâ il sfueat che al è plen di ‘savis e di cudui e cause di malatiis e di disgraciis, e dome trê di lôr a àn menât un cjar di glerie parom: cussì il sfueat al è ancjemò là (Josef Marchet, Lis predicjis dal muini); ducj chei des cjasis vicinis a jerin vignûts a judâ a scussâ panolis: doi cjarons che i bûs a vevin stentât a menâ dongje de braide gnove, la dì prime (Pieri Menis, La gjate); a bastin doi cuintâi di cjalcine, e un mieç cjar di savalon (Carlo Sgorlon, Prime di sere)
Sin. scjalarade , cjarade
1. grande cuantitât: i mâi a vegnin a cjars e a van vie a oncis
  Sin. scjalarade , cjarade , vagon , vagonade , palote
s.m. chel mieç di traspuart, o tai timps plui resints ancje un casson tirât di un veicul a motôr, decorât par carnevâl: lis comitivis in mascare e i cjars cu lis frascjis no si contavin, la bande e faseve furôrs in place e sul marcjât, il teatri «Macalè» al leve di un veion a di chel altri (Alan Brusini, Come tai romançs)
s.m. massime te ete classiche o in altris etis dal passât, cjar di corse o di vuere tirât pal solit di cjavai: [tal templâr dal templi di Zeus a Olimpie] a man drete di Zeus al sta Enomau, re di Pise, pari di Ipodamie, che al acete la sfide di Pelop de corse cui cjars fin a Istmie, sigûr di vinci come chês altris voltis (Adrian Cescje, Viaç aes origjins dal Logos)
s.m. vagon di tren, massime di tren materiâl: sierâts tun cjamp di concentrament cul mitra simpri pontât e po butâts sui cjars plombâts (Pieri Somede dai Marcs, L'ombrenâr); o vin podût rivâ in stazion e a li o sin rivâts a pene adore di cjapâ la ultime tradote che e partive dal Friûl e di folcjâsi suntune bancje di un cjar besteam (Pieri Somede dai Marcs, Sant Simon: 28 di Otubar 1917); Vera cul Nino e dute la compagnie taliane si sfrusignin tai cjars di un tren traspuart dal cjarbon (Ivano Urli, Storie di Vera)
s.m. [CO, TS] milit. viôt cjar armât
s.m. [CO, TS] astron. viôt cjar mat

Polirematichis e espressions idiomatichis

cjar grant loc.s.m.
cjar mat loc.s.m.
cjar piçul loc.s.m.
jessi indaûr cul cjar dal fen loc.v.
onzi il cjar loc.v.
strucjâsi il cjar loc.

Proverbis:

a menâ il cjar al vûl tamon
bisugne onzi il cjar par che al cori
cinc ruedis int un cjar no stan ben
cuant che a van i bûs tal fossâl al va ancje il cjar
cuant che al cjante il furmiâr, cirît sotet pes bestiis e pal cjar
cui che al à fen al à cjar
cui che al à fen al à pan e cjar
cui che al à mangjade la vene che al tiri ancje il cjar
e space plui la femine cuntun grumâl a puartâ fûr che no l'om cuntun cjar a puartâ dentri
il cjar al è cjâr
il cjar cence tamon al va tal fossâl
il cjar che no si onç al ciule
il cjar par che al cori bisugne onzilu
il cjar si tire daûr la scarpe
il mâl al ven a cjars e al va vie a oncis
no bisugne meti il cjar denant dai bûs
par che il cjar al cori, bisugne onzi lis ruedis
par che il cjar al ledi, bisugne onzi lis ruedis
sante Catarine o sîs o siet co vigne, spietimi a sant Tomât che o vignarai cul cjar cjamât