Dizionari de Lenghe Furlane

ruede  /-èd-/  rue|de  [FO]

1. s.f. orghin mecanic in forme di cercli che al pues zirâ tor di un as, par movisi suntune superficie cun mancul resistence:  i cjars a somein plui grancj in chel prin lusôr. Lis ombris che ur cjaminavin da pâr, si scurtin a sbighet, si tirin sot lis ruedis cjochis di zirâ (Dino Virgili, La aghe da pît la cleve); il tren al sparì di chê altre bande, si sfantarin la rombe de sô corse e il ciulâ des ruedis (Carlo Sgorlon, Il dolfin)
   Var. rovede , aruede , ravuede , vuarede , rivuede
   Cfr. cjâf , çoc , muiûl , rai¹ , gjavei , cercli , rinc , leam , bucule , passel , açalin , cuadrel , bocul
   
   1. ancje in riferiment al budiel o ae gome di un veicul:  al cirì la pompe e al tacà a sglonfâ une ruede de sô biciclete (Carlo Sgorlon, Prime di sere)
   2. cualsisei mecanisim, ancje interni, di forme e moviment circolâr:  la filande, come une glesie grande, dulà che lis mans a preavin su lis acis di sede lusinte che si faseve sù tes ruedis di len (Maria Forte, Sul cjar di Pauli Gurin); [il toc di agacie] lu sgjavà par lunc cuntun scarpel. Al inclaudà parsore une lame di cjastinâr tant secje che e pareve di fier. Daspò al fasè il mani e la ruede cui dincj. La scraçule e jere pronte (Carlo Sgorlon, Prime di sere)
   3. orghin mecanic circolâr mot de aghe in mulins o sim.:  la Roie e sclocjave difûr, tun discori cence padin di aghe sbaciade tai ingredeis des ruedis [dal batifier] e tal zîr dai mulignei (Maria Forte, Cjase di Dalban)
      Sin. rôt
2. s.f. (fig.) part di une dinamiche, di un aparât, di un complès che e lavore insiemi cun altris:  i talians de «milenarie civiltât» a àn ancjemò dibisugne di restâ sot pupil, tes ruedis sapientissimis dal mulignel centrâl (Josef Marchet, Ai beduins sì a noaltris no)
   
   1. situazion dinamiche, in evoluzion:  al è simpri stât chel che al à bisugne di vendi e chel che invezit al à bisugne di comprâ, une ruede eco, fantats (Alan Brusini, Il colôr dal marcjât); il mont al zire, al è une ruede che no si ferme mai (Pieri Menis, Chei di Muraie)
3. s.f. sorte di mecanisim che al podeve zirâ e che une volte al jere metût tal mûr di convents o di istitûts di assistence, dulà che a vignivin bandonâts i frutins a pene nassûts des maris che no volevin o no podevin tignîju
4. s.f. code di uciel slargjade par mostre:  la ruede dal pavon

Polirematichis e espressions idiomatichis

• a ruede lavade loc.av.
• meti i bastons fra lis ruedis loc.v.
• meti i bastons tes ruedis loc.v.
• meti i bastons tra lis ruedis loc.v.
• meti rais tes ruedis loc.v.
• meti tres tes ruedis loc.v.
• onzi lis ruedis loc.v.

Proverbis:

• a vuelin onzudis lis ruedis par che a zirin
• cinc ruedis int un cjar no stan ben
• cuant che il tamon al va stuart, lis ruedis a van tal fossâl
• la ruede che e dovarès tasê si fâs sintî plui di mai
• la ruede no zire se no si le onç
• la ruede plui triste e je chê che plui si fâs sintî
• par che il cjar al cori, bisugne onzi lis ruedis
• par che il cjar al ledi, bisugne onzi lis ruedis