Dizionari de Lenghe Furlane

rai¹  rai  [AF]

1. s.m. intune ruede, ognidun dai elements che a lein la bucule cul cercli:  Gjigjon al ingrampà un rai di ruede par judâ e cu la spadule tal ôr dal casselot, frontant i pîts te grave, al alçave di pês dute la braçadure daûr dal cjar (Dino Virgili, Il cjaradôr des animis)
2. s.m. [CO, TS] gjeom. intun cercli o intune sfere, ogni segment che al unìs un pont de circonference o de superficie cul centri:  8 pedanis metudis dilunc di un cercli dal rai di 19,20 metris (Valentina Pagani, Chiara e smicje alt)
   
   1. intun poligon regolâr, ogni segment che al unìs un vertiç cul centri
3. s.m. distance a partî di un ciert pont che al ven calcolât tant che centri:  il rai de zone di evacuazion al è stât puartât a 10 km (Alessandro Pascolini, Il disastri de centrâl nucleâr di Fukushima Dai-ichi)
   Sin. cercli , cjamp , zîr
4. s.m. emanazion di lûs di une font luminose e in particolâr ognidune des liniis, ancje dome imagjinariis, che a corispuindin ae direzion di emanazion de lûs:  il cîl al è simpri musticât e nol lasse passâ nancje un rai di soreli (Franca Mainardis, Un bosc cence colôrs)
   Sin. raiade , spere¹
   
   1. emission di lûs lineâr:  l'alien al tacà a sbarâ cuntun rai vert che al vignive fûr dal devant dal so argagn spaziâl (Checo Tam, Sense)
   2. lûs che e passe par un spazi libar iluminant alc:  al va viers il barcon, lu sburte e lu spalanche, un rai di lune al jentre e al ilumine il cuarp di Rose (Pieri Somede dai Marcs, Vilie di Nadâl (teatri)); tal coridôr a jentravin i rais dal soreli di un barcon de bande dal amont (Agnul di Spere, I prâts des Savodagnis)
5. s.m. [TS] fis. fas di ondis eletromagnetichis o di particulis elementârs:  la plui grande polarizazion si à cuant che il rai rifratât si propaghe a 90° rispiet ae direzion di propagazion dal rai rifletût (Marisa Michelini, Alberto Stefanel, La polarizazion de lûs)
   Sin. radiazion
6. s.m. [TS] zûcs intai zûcs di cjartis la fase che si son dadis dutis lis cjartis, zîr:  in chê sere a faserin cuatri cuaranteun di tressiet, sîs rais di briscule par finî, une cjantade subit difûr de puarte de ostarie e daspò si lassarin par lâ ducj a durmî (Roberto Ongaro, Cretevierte)
   Sin. zîr , man

Polirematichis e espressions idiomatichis

• meti rais tes ruedis loc.v.