Dizionari de Lenghe Furlane

gjambe  gjam|be  [FO]

1. s.f. ognidune des dôs parts dal cuarp uman jenfri ombul e pît:  al scugnî judâsi al passeman, parcè che lis gjambis i molavin come chês di un cjoc (Maria Forte, Cjase di Dalban); il miedi i à stecheade le gjambe e je à inzessade (Pieri Menis, Chei di Muraie); o voi fûr un moment a disgrisignîmi lis gjambis (Amedeo Giacomini, Tal ospedâl); piçul e svelt, Jacum Gri, cu lis gjambis cavalotis e sutis (Maria Forte, Il vivi al è chel rangjâsi)
   Cfr. cuesse , zenoli , pupule , polpete , sghinc
   
   1. ancje di bestiis:  di ogni archete al pendolave un ucielut, cu lis gjambis crevadis, za frêt (Pieri Menis, A uciei cu lis archetis); i cjavai cundut che a jerin ben glacinâts a sbrissavin te nêf […] e al jere pericul che si rompessin lis gjambis (Pieri Somede dai Marcs, 11 di Fevrâr 1929)
      Sin. çate¹ , talpe , sgripie
   2. [TS] anat. segment dal articul inferiôr, tra zenoli e cuel dal pît
2. s.f. misure aprossimative che e corispuint ae altece di une gjambe:  al saltave te nêf fonde une gjambe (Alan Brusini, Par stradis lungjis); il breâr al era plantât intai pâi a nencja una gjamba da cjera (Ovidio Colussi, Il pilustrât)
3. s.f. toc di bregons o cjalcis li che si met dentri la gjambe:  cul movilu il sanc al tornà a jessi fûr par une gjambe dai bregons (Pieri Menis, Chei di Muraie)
   Sin. trombe
4. s.f. toc di alc, soredut di un mobil, che al fâs di poie:  un scagnut cun trê gjambis; poiâ lis cjadreis su la taule, cu lis gjambis insù, par scovâ par tiere
   Cfr. pît
5. s.f. rie verticâl, spec. di letaris o notis musicâls:  scrivi ben la gjambe dal ele
6. s.f. struture vegjetâl che e ten sù lis fueis, une rose o une pome o ben struture che e ten sù il cjapiel di un fonc:  pe sagre di Sant Pieri, Zuan al puartave dongje, simpri, lis primis gjambis di sorc cul penac (Maria Forte, La rive di Sant Pieri); un gran di forment che, tornât te tiare, al bute fûr un fros, po une gjambe, po un spi (Josef Marchet, Lis predicjis dal muini)
   Sin. pecol , stoc¹
7. s.f. (fig.) mieç par stâ sù o par lâ indevant:  al è il prin modon dal progjet par dâi plui gjambis ae imprese economiche (Max Mauro, Un Friûl difarent: i 90 mhz di Onde Furlane)

Polirematichis e espressions idiomatichis

• a cuatri gjambis loc.av., loc.adi.inv.
• a gjambe rote loc.av.
• a gjambis loc.av.
• a gjambis puartaitmi loc.av.
• a mieze gjambe loc.av., loc.adi.inv.
• buine gjambe loc.s.f.
• cjapâ sot gjambe loc.v.
• cu la code fra lis gjambis loc.av.
• cu la code tra lis gjambis loc.av.
• fâ il pas plui lunc de gjambe loc.v.
• fâ la biele gjambe loc.v.
• in gjambe loc.adi.inv., loc.inter., loc.av.
• meti la code fra lis gjambis loc.v.
• meti la code tra lis gjambis loc.v.
• pierdi lis gjambis loc.v.
• spacâ la gjambe loc.v.
• su la gjambe loc.av.
• taiâ lis gjambis loc.v.
• tirâ la gjambe loc.v.
• vierzi lis gjambis loc.v.
• voltâ gjambe loc.v.

Proverbis:

• a cui che al file ben, rompii lis gjambis; a cui che al file mâl, rompii i braçs
• a fâ il pas plui lunc de gjambe, si romp il cavalot
• a vuelin trê robis par salvâsi: bon voli, buine gjambe e puarte vierte
• bisugne fâ il pas seont la gjambe
• ce che no si à in cûr, si à in gjambis
• cui che nol à cjâf al à gjambe
• dulà che il cûr al tire lis gjambis a puartin
• dulà che no si dopre il cjâf ur tocje a lis gjambis
• gjambe cervine, pote asinine
• il vin i da fuarce a la lenghe e ur e cjol a lis gjambis
• la bausie e à lis gjambis curtis
• la gjambe dal poleç e la ale dal cjapon
• lis gjambis a puartin là che il cûr al tire
• par salvâsi a vuelin trê robis: bon voli, buine gjambe e puarte vierte
• polente e formadi a mieze gjambe