Dizionari de Lenghe Furlane

vosâ  vo|sâ  [AF]

1. v.intr., v.tr. mandâ fûr la vôs une vore a fuart, sedi cun peraulis che dome cun viers o sunsûrs, par clamâ, laudâ, protestâ, cridâ e v.i.:  "Planc, planc!… Ce covential vosâ in cheste maniere!… Se e passin i pulizai, nus sgnachin in cjiscjel!…" (Arturo Feruglio, In cîl e je une stele!…); "Ce nassial culì?" al vosave Checo dut legri (Gianni Gregoricchio, Îr e doman); mi vosave intune orele un resentum di peraulis che jo no rivavi a capî (Stiefin Morat, Kebar krossè)
   Sin. berlaçâ , ciulâ , craçâ , cragnâ , cridâ , cuarnâ¹ , disgosâsi , fâ vôs di Atile , fricâ , sbardaiâ , scriulâ , spampanâ , tambarlâ , tampiestâ , trombonâ , ucâ , urlâ , vosonâ , vuacâ , vuicâ , zigâ , sberlâ , berlâ , berghelâ , sberghelâ , businâ
   
   1. ancje di bestie o di element naturâl:  il burlaç al coreve come une magne vosant dal mâr aes montagnis (Alan Brusini, Par stradis lungjis); une sere al tacà a soflâ e a vosâ un tramontan frêt, che in pôc timp al netà vie i nûi e al rivà a piturâ di ros il cîl de bande di soreli a mont (Carlo Sgorlon, Ombris tal infinît)