Dizionari de Lenghe Furlane

se¹  se  [FO]

1. coniun. cun valôr condizionâl, al introdûs une espression ipotetiche:  se no tu vuelis vê cualchi displasê, sint ce che o ti dîs: impaciti dai tiei afârs (Josef Marchet, Lis predicjis dal muini); se al studiarà di miedi, come che al sperave so pari, i coventarà un slac di bêçs par lâ a la universitât (Carlo Sgorlon, Prime di sere); se o fos cjase o podarès durmî fin tart (Checo Tam, Neapolis)
   Sin. intal câs che , tal câs che
   Var. su³ , si⁴
   Cfr. ben se , cuant¹ , mai che
2. coniun. in espressions enfatichis o retorichis:  se o vessis viodût chês sioris che a vignivin fûr di Sant Jacum! A largon, dutis camufadis; veletis e ombrenins che a svoletavin (Catarine Percude, La plui biele); se o savessis, ce cjampanis che a sunin sun jê! (Anute Fabris, A passe la scalmane); chest Bisol, pensôs ancje lui, se Diu vûl, dal destin de Patrie grande e de sante Unitât, al declare che la cuistion des autonomiis e je malmadure (Josef Marchet, Un element fondamentâl dal moviment autonomistic)
3. coniun. par introdusi proposizions dubitativis o interogativis indiretis o esclamativis:  no sai se al è di infidâsi di lui (Alviero Negro, Int di masnade); jo i ai dit se si podeve fâle ancje il prin miercus o l'ultin lunis e lui al è restât mâl e nol à savût rispuindimi (Antoni Beline, Sant Jacum, là che al finìs il mont); si po mai crodi se il Cosac i varès dit di no (Roberto Ongaro, Cretevierte); al po nome crodi se no mi bruse scugnî lassâ cheste citât sul moment che o scomençavi a compenetrâle! (Arturo Feruglio, Viaç a Vignesie); cuissà se o rivarai a viodiju inmò une volte, chei prâts… (Agnul di Spere, I prâts des Savodagnis)
   Cfr. ce che , trop che , cetant che , cemût che , come che
4. coniun. cun valôr causatîf:  se propit tu vûs savè dut ti disarai che infin o stuart o dret o ai fat il partigjan a riscjo di pierdi la piel (Pieri Somede dai Marcs, Un pugn di moscjis)
   Sin. dizà che , stant che , viodût che
5. s.m., s.m.inv. dubi, inciertece:  dal berdei dai pinsîrs, dai se e dai ma, i vignive simpri la stesse rispueste (Roberto Ongaro, Il muc)
   Sin. dubi¹ , esitazion , inciert , inciertece , ipotesi
   
   1. cundizion:  o aceti, ma cuntun se
      Sin. cundizion , risierve

Polirematichis e espressions idiomatichis

• ancje se loc.coniun.
• pûr se loc.coniun.
• se al ocor loc.av.
• se ancje loc.coniun.
• se ben che loc.coniun.
• se bute loc.av., loc.inter.
• se dal câs loc.av.
• se di no loc.coniun.
• se Diu al vûl loc.av., loc.inter.
• se Diu vûl loc.av., loc.inter.
• se mai loc.coniun., loc.av.
• se no loc.coniun.
• se ocor loc.av.
• se par câs loc.coniun., loc.av.
• se plui loc.coniun.
• se pûr loc.coniun.
• se si intive il câs loc.av.
• simpri se loc.coniun.

Proverbis:

• "se" e "ma" e "cuissà", a son trê peraulis di ponderâ
• "se" e "ma" no san ce cumbinâ
• "se", "ma" e "po" a jerin fradis
• i "se" e i "ma" a stan picjâts daûr de puarte
• il semenâ tart se al fâs bon prodot e je une sorte
• la bausie se e guste no cene
• se a 'nd è al è parint di magari
• se a 'nd ves e se a 'nt fos a jerin doi fradis e no si vignivin nuie
• se a 'nt fos, se a 'nd ves, se a 'nt sarès a son trê sants che no fasi miracui
• se a 'nt fos, se a 'nd ves, se a 'nt sarès a son trê sants che no judin
• se a 'nt fos, se a 'nt sarès e se a 'nd jere, a son trê sants che no judin
• se a 'nt fossin, se a 'nd vignissin, se a 'nd vessin, a son fradis
• se a 'nt fossin, se a 'nd vignissin, se a 'nd vessin, a son trê sants che a durin dut l'an