Dizionari de Lenghe Furlane

inciertece  /-tè-/  in|cier|te|ce  [CO]

1. s.f. cundizion di ce che nol è ciert, sigûr
   Sin. malsigurece , insigurece , instabilitât , malciertece , precarietât
   Var. incertece
   
   1. cundizion di ce che al pues cambiâ cun facilitât:  [...] Dut chest, intun contest [economic] di grande inciertece causade dai presits internazionâi di gas naturâl e petroli, dai coscj tecnologjics peâts al ûs des rinovabilis [...] (Matteo Mazzolini, Autonomie energjetiche nol vûl dî autarchie)
   2. cundizion di ce che no si sa se al sarà o no, se al larà ben o se al larà mâl e v.i.:  associazions che a saran, duncje, condanadis di fat ae inciertece e ae precarietât, butant vie esperiencis, competencis e professionalitâts (Erika Adami, Ddl 68, une leç che e discrimine e e condane ae inciertece)
   3. pinsîr, preocupazion par un avignî no sigûr:  in chei moments teribii di dubis e di inciertecis, e podeve jessi nome une buine anime, une sole, - e no la vevi tant lontane! - che varès podût tignîmi in stangje e fâmi filâ dret (Giovanni Gortani, Trê Rafaei in jerbe)
2. s.f. cundizion di ce che no si sa se al è sclet, vêr, autentic, che no si sa ben se al corispuint ae realtât
   Sin. malsigurece , insigurece , malciertece
   
   1. mancjance di cognossince cierte:  i modei meteorologjics che si puedin vê a disposizion al dì di vuê a son tarâts par ridusi il nivel di inciertece des variabilis atmosferichis classichis (Daniele Goi, Dario Bianchini Giaiotti, Fulvio Stel, Modelistiche numeriche pe valutazion e gjestion de cualitât dal aiar)
3. s.f. cundizion o carateristiche di cui che nol sa ce fâ, che i mancje sigurece, fermece tal decidi o tal fidâsi di chei altris o di se stes:  jo, us confessi, o ai vût come un moment di inciartece prime di acetâ di vignî (Dino Virgili, Dilunc il cuar); protestâ par difindi la lenghe furlane al è deventât simpri plui râr, te inciertece che il dismovi polemichis al podès fâ plui dam ancje a chês pocjis iniziativis positivis che a restavin (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie)
   Sin. insigurece , indecision , malsigurece , malciertece , esitazion
4. s.f. fat, episodi, detai che al mostre une mancjance di domini complet o di coerence, di precision e v.i.:  il stîl dal articul al è ancjemò fuart e cence inciertecis (Max Mauro, Felix Marchi e il sium dal furlan-furlan)
   Sin. insigurece , indecision , malsigurece , malciertece , esitazion