Dizionari de Lenghe Furlane

risierve  /-è-/  ri|sier|ve  [AF]

1. s.f. il meti in bande, il tignî cont alc par doprâlu intal avignî e ce che si met in bande:  tal Mai dal 1917 […] il sindic di Bagnarie Arse si lamente disint che i cinc reziments di fantarie talians a àn fiscadis dutis lis risiervis de popolazion civîl, obleant ae fam lis fameis (Angelo Floramo, Sîs mil ombris); la sô risierve di lens e jere scuasit finide (Carlo Sgorlon, Ombris tal infinît)
   Sin. provision¹ , proviste
   
   1. cuantitât di robe ancje imateriâl che si pues vê a disposizion:  prime di viarzi bocje bisugne jessi sigûrs di vê une grande risiarve di «savê»: savê «al cent» par podê infidâsi di fevelâ «al dîs» (Riedo Pup, I furlans e il fevelâ)
2. s.f. teritori delimitât cuntune dissipline di tutele particolâr, spec. par ce che al tocje la pussibilitât di lâ a cjace o il rispiet dal ambient naturâl:  viodi i anemâi che a popolin la risierve [di Curnin] (Ilenia Cristofoli, Vuê o fevelìn di… 10/04/2019); lu vevin invidât a cjace intune altre risierve (Checo Tam, Domenie di cjace)
3. s.f. teritori, spec. dai Stâts Unîts e de Australie, delimitât e cun regulis e leçs che a varessin di garantî aes popolazions nativis la pussibilitât di vivi daûr des lôr tradizions:  Peltier al è stât condanât ae preson a vite dopo di un procès farse cu la acuse di vê copât doi agjents dal FBI tal ’75 intun scuintri a fûc inte risierve di Pine Ridge (Carli Pup, Teritoris - Oms di Libertât); inte sô vite Goyathlay al a viodût il gjenocidi fisic dal so popul par gjavâi la tiere e par depuartâlu intes risiervis (Matteo Fogale, Geronimo, storie di un vuerîr apache)
4. s.f. cuantitât minime di carburant intal serbatori di un veicul che e lasse une autonomie limitade di funzionament:  o sin jentrâts in risierve, cirìn un distributôr; no vin tante benzine ma no sin nancje in risierve
5. s.f. [TS] milit. part des fuarcis a disposizion dal comandant di une grande unitât che e pues jessi doprade in câs di emergjence tant che rinfuarç par altris reparts:  un mês al bastà al Nugent, gnûf comandant de Armade di Risiarve, par meti adun sul Lusinç un 12 mil soldâts (Josef Marchet, Cuintristorie dal Friûl fin sot la Italie)
   
   1. cundizion e organic dai soldâts in congjêt che a puedin jessi tornâts a clamâ in câs di vuere:  vot agn di «obenanter Jäger, treu und redlich», a Vilac, cu la munture blancje; e altris doi agn di risiarve stant a cjase, vistût e armât, cul zilar da cjâf dal jet (Dino Virgili, La aghe da pît la cleve)
6. s.f. [TS] sport intai sports di scuadre, atlete che al sostituìs il titulâr se al covente:  a Lillehammer, par me e je stade une grande ocasion par fâ esperience ancje se no ai podût competi jessint che o jeri une risierve (Sara Palluello, Fâ il boscadôr… par sport. Interviste a Michael Del Pin, campion di "timbersport")
7. s.f. perplessitât o obiezion delimitade a cualchi pont specific:  a cjaparan pusizion a favôr de riforme, ma cun tantis limitazions e cun tantis risiarvis di no spaventâ lis animutis timoradis dai conformiscj di ogni sete (Josef Marchet, Diferencis)
   
   1. facoltât di mudâ, integrâ o revocâ alc che al jere stât acetât o concedût:  i vin dade la incariche a Dino Virgjli […] di inlustrânint ca e là cualchidune [di sagre] a so gust, cu la risiarve di tornâ sun chês che a son stadis saltadis chest an cu ven (Redazion SFF, Il Strolic furlan pal 1961)

Polirematichis e espressions idiomatichis

• risierve indiane loc.v., loc.s.f.