Dizionari de Lenghe Furlane

marum  /-ùm/  ma|rum  [CO]

1. s.m. [BF] savôr amâr o robe che e à un savôr amâr
   
   1. ecès di fêl tal stomi o riflùs di fêl
2. s.m. [CO] sintiment, sensazion o situazion di displasê che al pese, che al fâs malinconie:  dopo un altri moment al butà fûr il marum che i pesave sul stomi come se al fos stât di plomp: «Milie, jo ti conti dut… ma tu âs di zurâ chi denant dal ritrat di nestre mari che no tu disarâs nuie a dinissun […]» (Pieri Menis, Si disarès che e je inventade); metêt tal nestri cûr almancul la sperance che podìn viodi un pôc di lusôr fra tant marum… judaitmi a lâ indenant (Pieri Somede dai Marcs, L'ombrenâr)
   Sin. amarece , aviliment , avilizion , cruzi , displasê² , dolôr , gramece , lancûr , malincûr , maluserie , smare
3. s.m. [CO] sintiment, sensazion o situazion di displasê agressîf, di ostilitât o di ofese:  no si disbotonave mai, fale cualchi volte che si sbrocave cun Min par parâ jù il marum di cualchi malegracie dai nevôts (Franca Mainardis, Aiar di cjase); fra di lôr al coreve ancje cualchi marum parcè che lis oris a vevin di sei chês e chel tant di materiâl al veve di saltâ fûr (Maria Forte, La tiere di Lansing); dentri di te al mour dut e al cres doma marum, rabia e voia di trai folcs (Stiefin Morat, Donald dal Tiliment)
   Sin. malevolence , maluserie , nimistât , odi , odie , ostilitât , rancûr , ranzidum , ruze , tristerie , velen , asse¹ , tension , rabie , bile