Dizionari de Lenghe Furlane

rabie  /rà-/  ra|bi|e  [FO]

1. s.f. [TS] med., vet. malatie virâl dai mamifars, spec. di cjans e lôfs, ma ancje di bolps, pantianis, gnotui, e v.i., che e pues passâ al om e che si pant cun taramassis, spasims de faringje e de laringje, impussibilitât di gloti e riviel pai licuits:  il Prefet, constatât che une vore di cjans a vevin la rabie, al conseave di metiur sù une buine tasse, cu la sperance che cussì a lessin srarintsi (Riedo Pup, Il compromesso)
   Sin. idrofobie
   Var. raibe , raibie
2. s.f. (fig.) stât emotîf motivât di contrarietâts fuartis che dispès si manifeste cun reazions di agressivitât incontroladis:  lis peraulis ditis te rabie no son chês veris,… no stâ a viodi piês di ce che al è (Maria Forte, Cjase di Dalban); si è voltât cuintri di me cun rabie, mi visi ancjemò la sô muse infogade (Enrico Martina, Ricuarts e inlusions)
   Sin. bile , bol² , bruseghin , buzare , colure , disdegn , fêl , fotin , gaisse , grinte , ire , rabieç , rabioseç , rapine , ruze , stiche , asse¹
   
   1. emozion o sensazion negative, contrarie a alc o cdn., ma ancje platade o cence sbrocs violents:  e pensave tra se, «parcè la int fevelino? Rabie, rude rabie di sigûr» (Alan Brusini, Il svindic di Rosute)
      Sin. ruze , rusin , risintiment , fastidi
      Cfr. invidie , dispiet
   2. singul episodi, sbroc o sim. caraterizât di chel stât emotîf:  lis partidis e lis barufis de domenie a discjariin dutis lis rabiis che il guvier al fâs vignî sù a la int vie pe setemane (Riedo Pup, Balon: crodi, ubidî e paiâ)
      Sin. rabiade
3. s.f. determinazion agressive intal fâ o volê alc:  Dome cualchidun al tignì dûr cun rabie pe culture furlane; al vâl la pene di innomenâ un par ducj: l'abât Jacum Pirone di Dignan (Francesc Placerean, Cuintristorie dal Friûl dal 1866 fint in dì di vuê)
   Sin. calôr¹ , calorade , fervence , fervôr , snait
4. s.f. tension o violence dai fenomens naturâi:  e une gnot… Al jere di dîlu cun chê rabie di timp!… La zornade e jere stade pesante e gnervose par no podê scjariâsi. Il cîl si jemplà di nûi neris e i lamps a sfrissavin il dissen des monts (Maria Forte, Il bal spisimât des ombrenis); la aghe e vignive jù a ûs slac […]. Dute chê rabie e le a sbati cuintri il mulin (Josef Cjargnel, La farine dal diaul)
   Sin. empit , fuarce , rabieç , viamence

Polirematichis e espressions idiomatichis

• fâ rabie loc.v.
• mastiâ rabie loc.v.
• montâ la rabie loc.v.
• vê rabie loc.v.
• vignî rabie loc.

Proverbis:

• cui che dut al vûl di rabie al mûr
• no je rabie parsore di chê des feminis