invidie
/-vì-/
in|vi|di|e
[AF]
-
s.f.
sintiment negatîf, di ostilitât plui o mancul fuarte cuintri di cdn. pe sô fortune, pe sô felicitât, pes sôs cualitâts e v.i., dispès ancje cu la brame di chê fortune, di chê felicitât, di chês cualitâts:
no nassevin tristeriis, par vie che tes fameis no jere mai chê bondance che e fâs sclopâ la invidie (Maria Forte, Cjase di Dalban);
cussì ben regolât al deventà il plui biel de citât. Al rivâ tal palaç reâl a scambiâ promesse cu la tierce fie. Cuant che lu àn viodût chês altris ur cjapà tante rabie e tante invidie (Andreina Nicoloso Ciceri, Pipeta Sclagarot - Racconti popolari friulani I);
in cualchi paîs dal Friûl, se une femine e sclope di invidie, a disin: "E je invidiose come la mari di sant Pieri" (Luigi Gortani, La invidiose)
Cfr. asse1
, dispiet
, zelosie
, rabie
-
s.f.
persone o cjosse che e fâs di jeve di chest sintiment:
i cjavei neris inte lungje trece, invidie di dutis lis fantatis di Cjaicis (Raffaele Serafini, Soreli jevât a mont)
Proverbis:
- al è miôr murî di invidie che no di misericordie
- la invidie e je la tarme de fortune
- la invidie e je une malatie che si fâs cognòs daurman
- la invidie si rosee se stesse
- miôr vivi di invidie che no di misericordie
- se la invidie e fos la fiere, trops di lôr le batarès