velen
/-èn/
ve|len
[AF]
-
s.m.
sostance vegjetâl o animâl o produsude in mût artificiâl che e fâs dams chimics aes struturis viventis, ancje fin a causâ la muart dal organisim:
[la magne] e je un dai grancj sarpints che si cjatin tai cjamps, no à velen e si dîs che e puarti fortune (Sandri Carrozzo, Friûl di Magance);
in chê volte no butavin velens tai cjamps e i ucieluts ti cjatavin moscjis, viars e zupets a ogni fuee voltade (Alan Brusini, Par stradis lungjis)
-
s.m.
(fig.)
cualsisei robe, ancje imateriâl, che e fâs mâl, soredut in maniere che al sedi dificil parâsi a timp:
la ambizion l'è un velen / che planc planc si introdûs nel cûr del om (Pieri Çorut, Adio sperancis mês!);
ve che la vuere e veve inmò rivât a inlidrisâ il so velen ancje tes animis plui cjandidis (Roberto Ongaro, Il muc)
-
s.m.
(fig.)
sintiment trist o sensazion triste, soredut clucîts dentri vie par tant timp:
"Va, va, fâs svelte… la butilie de sgnape!…" "No stâ bevi chê robe!" "O ai il velen intal stomi, bisugne che lu pari jù, corpo!" (Arturo Feruglio, Un grop sul stomi)
Sin. marum
, tuessin
, rusin
-
espression di chel sintiment o di chê sensazion:
al vignì fûr il marum, la bile e il velen. Anzule e veve lassât che sô mari e tontonàs un biel pieç, po e tacà jê (Pieri Menis, La maghe no fale)
-
s.m.
notizie o cjacare false o cuntune part di falsetât, metude ator par fâ dam a cdn., par stiçâ rabie:
agns di miserie matereâl, di pericui di ogni sorte pe vuere e par dut chel che al è sucedût dopo, di velens e di suspiets, di persecuzions e di difamazions de bande sore dut dai "catolics", dai talianissims e dai democristians, di tante int riciclade, vendude, cence pudôr e cence cussience (Antoni Beline, La lôr vite, il plui biel cjant)
Proverbis:
- il tradiment al è dut velen
- il velen al sta te code