Dizionari de Lenghe Furlane

là  là  [FO]

1. av. in proposizions interogativis diretis e indiretis o in proposizions esclamativis, in ce lûc:  «E là vâstu cumò?», i domande la femine cuant che e rive a lâi dongje (Meni Ucel, La vacje); «In chest timp, là vûstu lâ? Li di Gjin, ve», i rispuint (Meni Ucel, Il salam)
   Sin. dulà
2. av. intun lûc lontan o no tant dongje di cui che al fevele:  Viodêso là la barcje? (Catarine Percude, Lis âfs); «Compari Nane mi ja puartât vuê di matina chiscj cuatri lens, disè la femina, e chel fregul di farina che l'è là nel cjanton» (Federigo Comelli, Il me paîs); e là four dal nuestri cjamp / spes jo me cjat un biel infant (Anonim, Sonet furlan)
   Sin. culà , culà vie , là vie , lenti , li¹ , venti , venti là , alì , alà
   
   1. intun lûc a pene dit o che si capìs dal contest:  la mont li a ret si pleave tun biel schenîl, e là parsore une schirie di cjasutis si metevin in mostre (Josef Cjargnel, La liende di Fondâs); sentade da cjâf dal fûc, sul caregon a braçâi […]. A cualunche ore dal dì che tu fossis lât par cjase, jê e jere là, tant di Istât che di Invier (Pieri Menis, Agne Ursule)
   2. ancje cun valôr gjeneric, in gjenar in corelazions, par segnâ un altri lûc indeterminât:  [i confins] vuê a son chi, îr a jerin là; doman sepi Diu dulà che a saran (Riedo Pup, I furlans e i confins)
   3. ancje cence valôr locatîf par indicâ insistence, ripetizion di peraulis, azions e v.i.:  dut al jere pront pe farse, ma clame ca, clame là, chel zovin che al veve di sostignî la part plui ridicule nol rispuindeve (Pieri Somede dai Marcs, In teatro)
      Sin. jù , li¹ , sù , chi¹ , ca¹ , culì , culà , alì , alà
3. av. cun valôr vocatîf par cdn. che al è caraterizât dal fat di jessi intun lûc diviers di cui che al fevele, ancje se al pues jessi no tant lontan:  "Viva là, vuardiis çambarlanis!" (Alviero Negro, Strumîrs e Çambarlans)
4. av. intun moment, intune situazion, intune cundizion che si capissin dal contest:  tirant il campanel a rivin lis camarelis, e là dut un netâ e smondeâ (Andreina Nicoloso Ciceri, Chê de principine - Racconti popolari friulani I)
   Sin. alore , culà , culà vie , là vie , lenti , li , venti , venti là , alì , alà , ca , ca ret , culì
5. av. ancje dome cun valôr enfatic:  propit in chest an - cjale là! - par trê martars di cheste Glesie di Aquilee, Canzian, Canziane e Canzianile, ti àn cjatât che i vues […] (Francesc Placerean, La Glesie universâl, cence lis Glesiis particolârs, e je un Glesie cence muse)
   Sin. alì , li , ca , chi , alà
   
   1. dongje di "chel", par rinfuarcîlu:  tornant a cjase al pensave che nancje par chei là [la famee di sô sûr] no veve di jessi masse legre (Carlo Sgorlon, Prime di sere); ise mo une pavee chê là? (Dolfo Zorzut, La furlane)
      Sin. alì , li
6. av., inter. (enf.) par esprimi che alc al è une conclusion, une consecuence, un efiet positîf, o ancje dome par dâ fuarce ae espression:  slargjaitsi un pôc là sù, tiraitsi dongje un pôc ca jù… oh là, cussì va ben… (Pieri Somede dai Marcs, Ce sdrumade); la golarine bisugne metile drete; e i bragons bisugne imbotonâju ben, nô un boton si e doi no. […] Là, cumò tu paris un cristian! (Vittorio Vittorello, A ogni cost)
   Sin. ve , cjo

Polirematichis e espressions idiomatichis

• butâ là loc.v.
• ca e là loc.av.
• can e là loc.inter.
• di là da la aghe loc.av., loc.adi.inv.
• di là da la aghe grande loc.av.
• di là dal clap loc.av., loc.adi.inv.
• in là loc.av., loc.adi.inv.
• là che loc.coniun.
• là di loc.prep.
• là di là loc.av.
• là di là di loc.prep.
• là jù loc.av.
• lâ là loc.v.
• là sù loc.av.
• là vie loc.av.
• menâ il cjâf di ca e di là loc.v.
• par là loc.av., loc.adi.inv.
• passantdoman di là loc.av., loc.s.m.
• plui di là che di ca loc.adi.inv.
• plui di là che no di ca loc.adi.inv.
• sù di là loc.av.
• sù par là loc.av.

Proverbis:

• cuant che si crôt di là un pas indenant, si va doi indaûr
• la cjase là che ducj lavore no va in malore